Vernîya Neteweyê Yewbîyayeyî de çalakîya roniştişî

Xeylî bajaranê Swîsre ra Kurdîstanijî ameyî têhet û vernîya ofîsê Neteweyê Yewbîyayeyî (NY)yê Cenevre de dest bi çalakîya roniştişî ya di rojan kerde.

Semedê baleantişê grevê vêşanîye yê ke bi waştişê wedartişê tecrîdê serê Rayberê Şarê Kurdî Abdullah Ocalanî yenê viraştene, vernîya ofîsê Neteweyê Yewbîyayeyî (NY) yê Cenevre de çalakîya roniştişî ya di rojan ameye despêkerdene.

Dayîkê Aşitîye bi laçiganê xo yê sipîyan tewrê çalakîye biyî û bale ante hêrişê polîsanê Tirkî yê vera Dayîkanê Aşitîye yê laçigsipîyan ser. Qiseykerdişan de ame vatene ke heta ke tecrîd bêro domnayene do çalakîye Kurdîstanijan zî dewam bikerê. Çalakîye ra dima Dayîkê Aşitîye şîyê serdana Mehmet Alî Koçako ke 20’ Sibate de vernîya NY’yî yê Cenevre de dest bi grevê vêşanîye yê bêdem-bêagêrayîşî kerd.