Wekîlê Meclîsê Federelî yê Partîya Çepe yê Almanya Helîn Evrîm Sommere, Gokay Akbulute û wekîla Meclîsê Eyaletê Hamburgî  Cansû Ozdemîre semedê paştdayîşê Rojawanî veng da îdareyê Berlînî.

Planê Amerîka yê ‘herêma biasayîşe’ yê  Rojawanê Kurdistanî wextêk o rojdemê Almanya de yo. Yeno pawitene ke Almanya mîyanê çend mengan de qerar bido ke ê bi teyareyanê Tornado tewrê ci bênê yada nê. Yewîyê Almanî ke çarçeweya mucadeleyê vera DAÎŞ’î de rasteyê teyareyanê AL- Asrakyî yê Urdunî de pawenê demê wezîfeyê înan 31’ê Teşrîna Verêne de beno de. Yeno pawetene ke semedê dergkerdişê demê wezîfeyê înan û ûca ra antişê Rojawanî dimayê tehtîlê hammanî  do Meclîsê Fedaralî de qerar bêro girewtene. La sere de hemparê hukmatê Merkele CDU û SPD grûbê meclîsî cîya cîya fikiryene.

Wekîlê Meclîsê Federelî yê Partîya Çepe yê Almanya Helîn Evrîm Sommere, Gokay Akbulute û wekîla Meclîsê Eyaletê Hamburgî  Cansû Ozdemîre semedê paştdayîşê Rojawanî veng da îdareyê Berlînî û nê vatî: ‘’Kurdan binkewtişê DAÎŞ’î de rolêko gird û zelal kay kerd. Bi şaranê Sûrîye sîtemo demokratîk awan kerd. Kurdan sey figuranê nê şerî vînayîş ma bişîdet red kenê. Şarê Vakur û Rojakewtenê Sûrîya semedê karê welatanê bînan şer nêkenê, semedê  ameyoxê şarê herême şer kenê. Ganî no mucadele bihurmet bêro qebûlkerdene û paştî bidîyo ci. Ganî îdareyo xoser ê Sûrîya bêro naskerdene û hetê Yewîya Neteweyîye ra bêro pawetene. Hukmate Fedaralî ganî paştî bido sîtemê xoîdarekerdişî yê Vakur û Rojakewtena Sûrîya, îhracatê sîlahan bido vindarnayene û bi temsîlkaranê Kurdan bêro têhet.’’