Wezîrîya Karanê Teberî ya Fransa bi eşkerayîyêke veng da ke wextê winasênî de ke DAÎŞ hema zî herême de gefêko pîl o, xîreto ke aramîya herême xeripneno û visneno binê tehlukeyî, wa nêro kerdene.
Wezîrîya Karanê Teberî ya Fransa derheqê hêrişanê îşxalî yê dewleta tirke yê vera Rojawan û Başûrê Kurdîstanî de keyepelê xo yê fermîyî de eşkerayîyêke daye.
Eşkerayîye de wina ame vatene: ''Fransa roja verêne ra nata operasyonê hewayî yê Tirkîya yê vera Rojhelatê Sûrîye û Herêma Kurdîstanî teqîb kena û vînena ke alozîye her ke şino bena pîlêr. Fransa nê hêrişanê Tirkîya ra qerqilîyena. Wextê winasênî de ke DAÎŞ hema zî herême de gefêko pîl o, xîreto ke aramîya herême xeripneno û visneno binê tehlukeyî, wa nêro kerdene. Fransa serwerîya Iraqî û îstîqrarê Herêma Kurdîstanî rê hûrmet kena.''
