Ewro grevê vêşanîye yê Strasboûrgî kewt roja xo ya 87’ine. Strasboûrg de 14 kesî seba ke tecrîdê serê Rayberê Şarê Kurdî Abdullah Ocalanî bêro wedaritene kewtîbî grevê vêşanîye û no xoverdayîş hetê Kurdanê Ewropa û pêroyê dinyaye ra yeno wayîrvejîyayene.

Vizêrî bajarê Fransa yê Crêîlî ra 20 endamê Meslîsê Şarî, parlamentera HDP’yî ya verêne Nursel Aydogane û hemsereka Şaredarîya Cizîre Leyla Îmrete ya ke ameya îxrackerdene ameyî zîyaretê xoverdayoxanê grevê vêşanîye yê Strasboûrgî.

Endamê Meclîsê Şarî yê Crêîlî Azmî Guvenî derheqê xoverdayîşê grevanê vêşanîye de qiseykerdişêk kerd û va “Zereyê ma de yew wolkano ke bibi serdin newe ra teqa”

'NO XOVERDAYÎŞ DO BERÊ ÎMRALÎYÎ AKERO'

Parlamentera HDP’yî ya verêne Nûsrel Aydogane zî vat ke grevê vêşanîye çalakîyanê demokratîkan ra çalakîya  tewr girane ya û îradeyê merdimî bi na çalakîye  hîna zelal yeno dîyayene. Aydogane wina dewam kerd: “Qet yew çek nêeşkeno îradeyê merdimî werte ra wedarno û çin bikero. Ez bawer kena ke no xoverdayîş do berê Îmralîyî akero û bibo serkewte. No xoverdayîş de wezîfeyê ma zî o yo ke ganî ma bibê vengê çalakwanan û paştdarîye bidê ci.”

'GANÎ PAŞTDAYÎŞ HÎNA BÊRO GIRDKERDENE'

Xoverdayoxe Gulîstan Îke zî bi nameyê xoverdayoxanê grevê vêşanîye qisey kerd. Îke bale ante xoverdayîş û Newroze ser û wina va: ”Ma bi xoverdayîşê serkêşîya Leyla Guvene ver bi Newroze şonê û ez bawer kena ke ma do bibê serkewte. Bi mîlyonan Kurdî, bi zerrî û hişê xo ma het de yê û ma naye baş vînenê. No rayîr de serkewtişî ra wet  çiyêk çin o û ma do miheqeq bibê serkewte. Ma zî, şarê ma zî baş zano ke no tecrîd ma pêroyînan ser esto û ganî ma do bişiknê. Paştdarîya ke heta ewro ameya dayene hêca ya la ganî hîna bibo zêde.”