Hemsereka Konseya Rayberdişî ya KCKyî Besê Xozat beşdara Bernameyê Taybetî yê Medya Haber TVyî bîye û rojdem ercna. 

Qiseykerdişê Besê ra tayê noqtayê girîngî wina yê:

‘’Ez şexsê embaz Fuat û Rizayî de pêro şehîdanê menga gulane yad kena. Embaz Fuat 3yê temmuza 2018î de wexto ke akademî de perwerde dayêne netîceya hêrişê hewayî de şehîd bi. Embaz Riza û Fuatî kedêka pîle daye partîye û ê tim bîyê perwerê Rayberîye. 

2025 de ma dekewtî mîyanê qewimîyayîşanê giranan. Dewleta tirke heta nika rixmê pêro hêrişanê xo zî nêeşkaye têgêrayîşê azadîye çin bikera û derbê giranî werdî. Nê bîyî sebeb ke dewleta tirke neçaretîye ra Rayber Apoyî reyde pêvînayîşan bikera.  Kurdan ser o xeylê hesabî û planî est ê. La Rayber Apoyî prosesî ercna, înîsîyatîf girewt. Vengdayîşê ey ser o PKKyî kongreya xo kerde. Kongre bi perspektîfê Rayber Apoyî kom bîye. Kongre de bira feshkerdişî û çekverdayîşî ameye girewtene. La ez naye vaja birê Kongreya PKKyî ya 12ine tena bi azadîya Rayber Apoyî eşkenê bikewê pratîkî. Tena Rayber Apo eşkeno çeke şerwanan ra bigêro. Eke Rayber Apo bi azadî nêeşko têbigêro mumkîn nîyo ke PKK çekan war verdo. 

Kesê ke prosesê haştîye nêwazenê rantwer ê. Ma dî ke Tirkîya de zaf rantwer est ê. Proses tayê dormeyan aciz keno. No şero ke 50 serrî yo dewam keno bîyo sebebê rijîyayîşê Tirkîya. 

Partîya Zafer û ÎYÎ ûsn ra ber nêzdîbîyayîşê partîyanê bînan hol ê la qîm nêkenê. Ganî partîyê muxalîfî hîna zaf paştî bidê nê prosesî. Cuya hempare ganî pîya bêra awankerdene. Meseleya kurdan tena bi waştişê kurdan nêna çareserkerdene.

Prosesê Vengdayîşê Haştîye û Komelê Demokratîkî prosesêko winayên o ke cinîyî eşkenê tede bi azadî xo îfade bikerê. Cinîyî merkezê nê prosesî de yê coka ganî ê hîna zaf mesuldarî û erkan bigêrê xo ser.

Heya Herêmanê Pawitişî yê Medya de şer dewam keno. Dewlete hema şer de israr kena. Heta ke hêrişî dewam bikerê xora gerîlayî zî cewab bidê. Ma kongre de derheqê şerî de tewirê xo mojna. Hinî eşkera yo ke kam şer wazeno.

Nêzdîbîyayîşê vera Mexmûrî ez şermezar kena. Iraq goreyê menfaetanê xo yê bi Tirkîya nêzdîyê Mexmûrî beno. Teda û operasyonê vera Mexmûrî meşrû nîyê. Ganî Iraq nêbê hemparê kayanê gemarinan. Almanya zî bi nê hawayî ganî nê prosesî de tedayanê vera kurdan û dezgehanê kurdan ra fek vera bida.

Polîtîkayê Sûrîye yê Tirkîya dişmenîya vera kurdan ser o ronîyayê. Heta ke Tirkîya meseleya xo ya bi kurdan çareser nêkera nêeşkena teber de bihêz biba. Ganî Tirkîya polîtîkayanê xo yê serê Sûrîye ra fek vera bida.’’