Hîrê dezgehanê bingeyînan ê Yewîya Ewropa (YE), Konsey, Komîsyon û Parlamentoyî bire daye ke kombîyayîşê fermî yê Anqara û Antalya betal kerdî.

Pisporan dîyar kerd ke na game sey nêrazîbîyayîşêkê vera qewimîyayîşanê peyênan ê Tirkîya yo.

Reya verêne YE asta hişyarîye de wina pêvînayîşî betal kerdî. Tirkîya de tepişîyayîşê şaredaran, tedayê vera rojnameger û muxalîfan û binpaykerdişê esasanê dewleta huqûqî sey ‘goreyê erjanê YE’ nêameyî pênasekerdene.

Kombîyayîşê pêroyî yê roja sêşemeyî yê Parlamentoyê Ewropa (PE) de apeyşîyayîşê demokrasîyê Tirkîya û tepişîyayîşê Ekrem Îmamogluyî ameybî ercnayene. 

Roniştiş de eşkerayîya tewr balkêşe hetê Endama Mesuldarîya Averşîyayîşî ya Komîsyonê Ewropa Marta Kos ra amebî dayene. Marta Kos vatibi: ‘’Ma sey endamê YE pabeyê standartanê demokrasîyî yê tewr pîlan ê. Tepişîyayîşê Îmamogluyî persê cidîyî xo de ardî.’’

PE de komanê sîyasîyan ê cîyayan zî Tirkîya rexne kerdibî.