Kurd Akadî bi hemkarîya Enstîtuyê Kurdkî yê Dusseldorfî, Yewîya Mamostayanê Kurdan (YMK) û Zanîngehê Dortmundî bi sernameyê Ziwanê Dayîke, Pirziwanîye û Cîyarengîye konferansêk serûber kerd. 65 kesî tewrê konferansê Zanîngehê Dortmundî bîyî.

Beşê yewînî yê konferansî de Dr. Renate Deluçhi pêşkêşê xo yê bi sernameyê ''Diziwanîye: zanayîş û ziwan'' kerd. Serekê YMKyî Abdulkadîr Ulumaskanî zî pêşkêşê xo yê bi sernameyê ''Sînor, Zehmetîye û Ganîyîya Çalakbîyayîşî'' kerd. Ulumaskanî vat: ''Derheqê kurdkî de her kes berpirsîyarîya xo wa bero ca. Ma do menga gulane de hukmatê herêma Başûrî reyde derheqê na babete de pêvînayîş bikerê.''

Zanîngehê Hewlerî za Zana Jamal Kareem bi rayirê Skypî tewrê konferansî bîye û sozê hemkarîye da. Komelnas Munevvere Azîzoglu, Prof. Îbrahîm Seydo Aydoganî bi sernameyê ''Polîtîkbîyayîş û Ziwan: Bazarîye û Nakokîye'' û Davut Yeşîlmenî zî bi sernameyê ''Edebîyatê Kurdkî: Tesîrê Komelî û Ziwanî'' beşê diyînî de pêşkêşê xo kerdî.  Seydoyî vat: ''Wazenê ke waştişê kurdan sey ziwanê kurdkî werte ra wedarê, polîtîkaya xo yê 'tirkbîyayîşî' bîyarê ca.''

Tew peyênî de zî Dr. Talîba Suzerî zî bi sernameyê ''Mîgrasyonê Domanî û Ciwanan'' pêşkêşê xo kerd.Beşê pers û cewaban de mamostayanê Rojawanî qala îmkananê mamostatîya kurdkî ya Almanya kerde. Serekê YMKyî Abdulkadîr Ulumaskan û Prof. Îbrahîm Seydo Aydoganî zî qala karê xo yê hemparî kerd û vat ke ê do xîret bikerê ke Zanîngehê Fransa de xebatêka winasêne bikerê û sertîfîka bidê mamostayan ke bieşkê mamostatîye bikerê.