Şaristanê Cenevre yê Swîsre de, Zanîngehê Karkerî de konferansê bi sernameyê 'Filîstîn-Kurdîstan-Întîfada-Serhildan' serkêşîya Merkezê Komelê Demokratîkî yê Kurdan ê Cenevre (NCDK) û Yewîya Cinîyan ê Kurdan a Swîsre (YJK-S) de konferansêk ame kerdene.

Partîya Şorişgêre ya Komunîste (PCR) û Torra Serewedaritişî ya Enternasyonalîste zî paştî daye konferansî. 

Konferans de hêverî Wekîla HDPyî ya verêne Ayşe Acar Başaran qisey kerd. Ayşe vist vîrî ke Rayberê Şarê Kurdî Abdullah Ocalan 25 serrî yo binê tecrîdêkê giranî de yo. Ayşe vat: ''Tecrîdê Îmraliyî vilayê her cayî bîyo. Hetê bînî ra çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de têkoşînêko aktîf yeno kerdene. La ganî na hemle bi paştdayîşêkê enternasyonalîstî bêra xurtkerdene.''

Dima Temsîlkarê PCRyî Luc Rolliyî qisey kerd û ard ziwan ke sîstemê kapîtalîzmî seba ke waranê xo hîra bikero têgêreno. Rolliyî îfade kerd ke Şorişê Rojawanî reyde Têkoşînê Azadîye yê Kurdan û têkoşînê şarê Filîstînî ruhê xoverdayîşî afernayo û nê ruhî eşkenê çareserîya meseleyan peyda bikerê.

Beşê diyînî yê konferansî de aktîvîstanê Komîteya Paşydayîşê Bi Rojawanî û Torra Paştdayîşê bi Filîstînî qisey kerd.

Beşê pers û cewaban ra dima beşdaran çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de posterê Abdullah Ocalanî akerdî û konferans qedîya.