Şaristanê Davosî yê Swîsre de çalakîyê vera Forumê Ekonomîkî yê Dinya (WEF) yo ke 21ê çeleyî de dest pêkerd dewam kenê. Bi seyan kesî Zurih de ameyî pêser û bi sloganê 'No WEF' (WEFî rê ney) WEF protesto kerd.
Çalakîyê vera WEFî yo ke emser reya 500 yeno kerdene dewam kenê. 90 welatan ra zaf sîyasetmedarî, merdimê karî, temsîlkarê dezgehanê komelkîyan û zanistî zî tede tewr tay 2800 kesî tewrê forumê Ekonomîkî yê Dinya (WEF)yo ke mabênê 21-24ê çeleyî de yeno kerdene bîyî.
Ewro bi hezaran kesanê ke bi vengdayîşê rêxistinanê ekolojîstan û antî-faşîstan ameyî têhet bi rayraşîyayîşêk WEF protesto kerd. Aktîvîstê Têgêrayîşê Ciwanan ê Şorişgêran zî tewrê çalakîye bîyî û mabênê polîsan û çalakîkeran de pêkewtişî qewimîyayî.
Aktîvîstanê Têgêrayîşê Ciwanan ê Şorişgêran bi pankartanê bi nuşteyanê ''Rojawan bipawê'' û ''Şer=Kiştoxê îklîmî'' tewrê çalakîye bîyî û çalakîye Helvetiaplatzê Zurihî de dest pêkerd. Rayraşîyayîş de bi hawayêkê nîzamî sloganê vera kapîtalîzmî, krîzê îklîmî û bi kurdkî û almankî zî sloganê paştdayîşê Rojawanî ameyî vatene.
Çalakîye de Serekê DYA û Serekkomarê Tirkîya Recep Tayyîp Erdogan zî îşxalê Rojawanî ra semed bi sloganan ameyî protestokerdene. Çalakîye de mabênê çalakîkeran û polîsan de pêkewtişî qewimîyayî.
Rayraşîyayîş merkezê şaristanî de saetêk û nême dewam kerd û saete 19:30 de Helvetiaplatz de qedîyaye.
