Seba wedarîyayîşê tecrîdê Îmraliyî û caardişê azadîya Rayberê Şarê Kurdî çalakî û nawnayîşê kurdîstanijan pêro serre dewam kerdî. Xoverdayîşo emserîn serranê bînan ra zaf cîya û bitesîr bi. Grevê vêşanîye yê tepişteyanê dewaya PKK û PAJKî morê xo da binê serra 2021î ro.

Grevê vêşanîye 27ê teşrîna peyêne ya 2020î de dest pêkerd û 290 rojan ra dima 12ê êlula 2021î de ame qedînayene. Nameyê tepişteyan ser o Denîz Kayayî eşkerayîye daye û vat ke ê do tewrê çalakîyanê Hemleya Wextê Azadîye bibê. Seba paştdayîşê grevê vêşanîye yê 2 hezar tepişteyan û hukmwerdeyan Kampa Mexmûrî û Kampa Laviroyî ya Yunanîstanî de zî grevê vêşanîye dîya destpêkerdene.

Kurdîstanijan Ewropa, Asya û Amerîka de dostanê xo reyde 2021 de hîna bi tesîrî, rêxistinî û emrdergî xo ver da. Warê mîyanneteweyyî de seba qedînayîşê bêvengîya dezgehan serra 2021î de nawnayîşî bêmabên ameyî kerdene. Kurdîstanijan waşt ke Neteweyê Yewbîyayeyî (NY), Konseya Ewropa (KE), Komîteya Vergirewtişê Îşkenceyî (CPT), Dîwanê Edaletî yê Laheyî û hukmatê welatanê Ewropa vera tecrîdî têbigêrê.

Verê bînaya NYyî de çalakîye 47 hewteyî yo dewam kena

Seba azadîya Rayberê Şarê Kurdî Abdullah Ocalanî welatanê Ewropa û çar hetanê dinya ra Sekreterê Pêroyî yê NYyî Antonio Guterresî rê bi des hezaran mektubî erşawîyayî. Mektuban de venga Guterresî ame dayene ke cade têbigêro. Kurdîstanijan dostanê xo reyde verê Ofîsê NYyî de şaristanê Cenevre yê Swîsre de 25ê çeleyê 2021î de dest pê çalakîya roniştişî kerd. Kurdîstanijan verê bînaya NYyî de xeyme akerde û xîret kerd ke vengê xo bidê eşnawitene. Çalakîya ke her roja çarşemeyî yena kerdene 47 hewteyî yo dewam kena.

Nobeta Azadîye kewte serra 10.

Nobeta Azadîye ya ke 25ê hezîrana 2012î de şaristanê Strasbourgî yê Fransa de verê bînayanê KE, Parlamentoyê Ewropa (PE), Mehkemeya Heqanê Merdiman a Ewropa (MHME) û CPTyî de dîyabî destpêkerdene karantîna ra teşrîna peyêne ya 2020î de ameye vindarnayene. Karantîna ra dima 19ê çeleyê 2021î de çalakîye newe ra dîyaye destpêkerdene.

Her hewte komêka kurdan nobete dewr gêna. Çalakîye ha dekewena serra 10. Bi wesîleya serra 10. a nobete xetlêk waran de çalakîyêka pîle ameye kerdene. Çalakîye de bi ziwananê cîya-cîyayan broşur û kitabî ameyî vilakerdene û qala cu, têkoşîn û girîngîya azadîya Ocalanî ameye kerdene.

Verê kurdan Strasbourg bi

Kurdan Nobeta Azadîye ra ber 2021 de Ewropa de xeylêk çalakîyê pîlî kerdî. 12ê gulane de vengdayîşê TJK-E û KCDK-E ser o şaristanê Strasbourgî yê Fransa de çalakîya roniştişî dîyaye destpêkerden. Çalakîye de tecrîdê Îmraliyî, hêrişê îşxalî yê vera Başûrî û bira Wezîrîya Karanê Teberî ya Amerîka ya vera kadroyanê rayberan ê PKKyî ameyî şermezarkerdene. Çalakîye çar hewteyî dewam kerde.

Çalakîyêka bîne ya emrderge zî Strasbourg de 1ê kanûna 2021î de dest pêkerde. Çalakîye wextê kombîyayîşê Komîteya Wezîran a Konseya Ewropa de dest pêkerde ke kombîyayîş de cezaya muebede ya vera Abdullah Ocalanî bi rojdem.

Çalakîyê bêîteatîya sîvîle

Têkoşîn û xoverdayîşê Strasbourgî têna dewleta tirke nê Fransa zî tersnaye. Komployê 9ê Teşrîna Verêne ra verî seba azadîya Ocalanî verê Dêrê St. Maurice de xeyme ameye akerdene la polîsanê Fransa hêrişê çalakîkeran kerd. A roje nawnayîşê girseyî ra dima verê Konseya Ewropa de dewa komune ameye awankerdene labelê polîsan bi şîdetî hêrişê ney zî kerd û wedarnaye. Verê CPTyî de ciwananê kurdan 5ê nîsane de dest pê çalakîya bêîteatî ya sivîle kerde la polîsan reyna hêriş kerd. 7ê gulane de verê MHME de ciwanan çalakîye kerde la hêrişê polîsan de 2 ciwanî ameyî destbendkerdene.

Kurdîstanijî şaristanê Den Haagî yê Hollanda de verê Dîwanê Edaletî yê Laheyî de ameyî pêser û waşt ke tecrîdê vera Ocalanî bêro wedaritene. Reyna serrgêra Komployê 15ê Sibate de û 9ê Teşrîna Verêne de îdîayanê ke serê medyaya dîjîtale de 16ê adara de ameyî vilakerdene çalakîyê pîlî ameyî kerdene. Bi wesîleya 10ê Kanûne Roja Abdullah Ocalanî rê Azadîye nawnayîşê bi girseyan ameyî kerdene.

Rayraşîyayîşê Dergî

Rayraşîyayîşo Dergo ke her serre Almanya ra heta şaristanê Strasbourgî yê Fransa yeno kerdene, emser zî rixmê pêro astengkerdişan ame caardene. Emser rayraşîyayîşî şaristanê Hanauyî de bi nawnayîşêkî dest pêkerd û enternasyonalîstî zî tede qsê 150 kesî tewrê ci bîyî. Çalakîye 9 rojan xeylêk şaristanan de dewam kerde û şaristanê Freiburgî de bi rayraşîyayîş û nawnayîşî qedîyaye. Mabênê Neu-Munster û Kielî de rayraşîyayîşo derg ê di rojan ame kerdene. Serrgêra 15ê Sibate de Stuttgart de zî rayraşîyayîşo derg ame kerdene.

Çalakîya Rayraşîyayîşê Dergî emser zî hetê TCŞ û TÊKO-JIN ra seba azadîya Abdullah Ocalanî ameye kerdene. Rayraşîyayîş 12ê êlule de dest pêkerd. Almanya, Fransa, Avusturya, Swêd, Hollanda, Îngilîstan û Swîsre ra bi seyan ciwanî tewrê rayraşîyayîşî bîyî. Çalakîye 6 rojan dewam kerde. Rixmê provakasyonanê polîsanê Almanya û komanê faşîstan ê AKP-MHPyî zî ciwanan 18ê êlule de bi coşî rayraşîyayîşê xo qedîna.

Çalakî û nawnayîşan reyde seba azadîya Ocalanî çalakîyê şexsîyî zî ameyî kerdene. Paytextê Fînlandîya Helsinki de kurdê bi nameyê Îdrîs Al Oso serrgêra Komployê 15ê Sibate de seba şermezarkerdişê tecrîdî 42 kîlometreyan, 3 saet û 40 deqayan vazda. Wextê vazdayîşî de şarê fînî zî paştî daye ey. Kurdê bi nameyê Shevan Rasheed bi 20 kîlometreyan, Gelo Jîmhan zî bi 7 kîlometreyan vazdayî.

Kitabxaneyo Gerok ê Rayberîye

Kitabxaneyo Gerok ê Rayberîye zî çalakîyan tewr bitesîran ê emserî ra yew bi. Otobusa ke tede kitabê Ocalanî estbîyî xeylêk şaristananê Ewropa ra gêra û waranê pîlan de park kerd. Şaristananê Oldenburg, Bielefeld, Wuppertal, Saarbrucken, Trier, Darmstadt, Aschaffenburg, Mannheim, Giessen, Russelsheim, Wiesbaden, Mainz, Frankfurt, Berlin, Dresden, Leipzigî yê Almanya de, şaristananê Stockholm, Uppsala, Orebro, Jerntorget, Malmo û Goteborgî yê Swêdî de, şaristananê Lozan, Solothurn, Zurih, Bern û Luzernî yê Swîsre de, şaristananê Paris, Marsilya, Draguignan, Montpellier, Toulouse û Bordeauxî yê Fransa de, şaristananê Amsterdam û Den Haagî yê Hollanda de, şaristanê Brukselî yê Belçîka de, şaristanê Viyana yê Avusturya de û şaristanê Roma yê Îtalya de gêra.

Keştîya Azadîye

Serranê vîyarteyan ra cîya 2021 de çalakîyêka cîyaye ameye kerdene. Na çalakîye 'Keştîya Abdullah Ocalanî rê Azadîye' bîye. Nêzdîyê 50 kesê sey sîyasetmedar, akademîsyen, rojnameger, nuştox, temsîlkaranê têgêrayîşê cinîyan û hunermendan Almanya, Fransa, Swîsre, Brezîlya, Spanya, Swêd, Îtalya, Yunanistan û Îngilîstanî ra cinuştî keştîye û 8ê teşrîna peyêne de Yunanîstanî ra kewyî rayîr. Keştîye 12ê teşrîna peyêne ya 1999î de serrgêra şîyayîşê Roma yê Rayberê Şarê Kurdî de resaye Îtalya.

Welatperwerê kurdî vera tecrîdî bedenê xo da adirî ver

Şaristanê Dresdenî yê Almanya de welatperwerê bi nameyê Halîl Şenî serrgêra Komployê 15ê Sibate de bedenê xo da adirî ver. Halîl Şeno ke 25 serrî yo surgun bi, seba şermezarkerdişê tecrîdî bedenê xo da adirî ver û dima nêweşxane de şehîd bi. Halîl Şenî peyê xo de mektûbêk verdaye û vat: ''Bi mengan o merdimîye Rayber Apoyî ra agahîye nêgêna, ne avûkatî ne zî keyeyê ci nêeşkenê pêvînayîşî bikerê. Vera ney kar yeno kerdene, têgêrayîş zî esto la qîm nêkeno.''