Waştişê 'Abdullah Ocalanî rê Azadîye' serranê bînan ra cîya 2021 de bi desan welatan de paştdayîşêko global dî. Startê xoverdayîşê serra 2021î yê seba azadîya Rayberê Şarê Kurdî Afrîkaya Başaûrî de welatê Mandelayî de dîya. Madela dima ke 27 serrî zîndan de mendbi netîceya kampanyayanê mîyannetewîyayan de azad bibi.

11ê çeleyî de Koma Xebate ya Kurdan a Afrîkaya Başûrî (KHRAG) û Konfederasyonê Sendîkayan ê Afrîkaya Başûrî (COSATU) kampanyaya bi nameyê 'Wextê ci ameyo, seba ke Tirkîya de haştîyêka edîle bêra caardene Abdullah ocalanî rê azadîye' daye destpêkerdene. Çarçewa kampanya de Sekreterê Pêroyî yê Neteweyanê Yewbîyayeyan (NY) Antonie Guterresî rê mektube nusîyaye. Mektube de ame waştene ke vera tecrîdê Îmraliyî Komîteya Vergirewtişê Îşkenceyî (CPT) cade têbigêra û 'Qaîdeyê Nelson Mandelayî' seba Ocalanî zî bêrê caardene.

Dima Yewîya Avûkatanê Seba Heqanê Merdiman a Demokrasî û Dinya (ELDH), New World Summit û Îtîfaqê Pawitişê Heq û Azadîyan ê Mîyanneteweyî (AIDL) pare kerd ke ê zî paştî danê kampanyaya KHRAG û COSTAUyî. Bask, Belçîka, Bulgaristan, Almanya, Îngilîstan, Fransa, Yunanîstan, Tirkîya, Îtalya, Makedonya, Rûsya, Sirbîstan, Swîsre, Îspanya û Ukrayna de komeleyê endamî yê ELDGHyî estê. New World Summit zî asta globale de xebatanê sîyasîyan û huneran keno.

Xeylêk welatan de vengdayîş

Serrrgêra 22. ya Komployê 15ê Sibate de bi seyan nuştox, rojnameger û namdaran deklarasyonê bi nameyê 'Abdullah Ocalanî rê Azadîye' weşana. Vengdayîş de ame vatene ke Abdullah Ocalanî têgêrayîşê modernî yê kurdan û Ronesansê Kulturê Kurdan rê hetkarîye kerde û ame parekerdene ke ganî Abdullah Ocalan bêro azadkerdene.

Heman rojan de Başûrê Kurdîstanî de zî deklarasyono winasên ame îlankerdene. Tewr tay 1250 roşnvîranê Başûrê Kurdîstanî û ereban binê nameyê 'Komîteya Ocalanî rê Azadîye' pare kerd ke ê paştî danê kampanya. Kampanya 15ê sibata 2021î de resaye hedefê xo û 8 hezar îmzayî seba azadîya Ocalanî dîyayî.

Hashtag 30 welatan de wesa bi mîlyonan kesan

Serrgêra Komployê 9ê Teşrîna Verêne de rayberîya Meclîsê Medyaya Dîjîtale ya Kurdîstanî de medyaya dîjîtale de kampanyaya hashtagan a '#FreedomForOcalanNow' asta globale de dîyaye destpêkerdene. Mîyanê çend saetan de bi mîlyonan kesan hashtag vila kerd. Rixmo ke tay platforman kampanya asteng û qedexe kerde, kampanya 3 rojan dewam kerde. Akademîsyen, nuştox, sîyasetmedar, sendîka, pawitoxanê heqanê merdiman, wekîlan û temsîlkaranê bi hashtagan vat ke 'Abdullah Ocalanî rê azadîye nika hewce ya.' Avusturalya ra heta Fînlandîya û Malezya xeylêk kesan paştî daye kampanya.

Waştişê azadîye çar parzemînan ra vila bi

Serra 2021î de her roje sere de Ewropa de xeylêk welatanê dinya de kampanya, nawnayîş û çalakîyê cîya-cîyayî ameyî kerdene. Panaromaya 2021î ya xoverdayîşê seba azadîya Ocalanî wina ya:

Brîtanya: Sendîkaya tewr pîle ya Brîtanya Unite The Union û GMByî nîsana 2016î de kampanyaya 'Ocalanî rê Azadîye' dabî destpêkerdene ke 2,3 mîlyon endamê nê sendîkayan estê. Na sendîka 2021 de na kampanya asta globale de vila kerde û venga her kesî da ke paştî bido kampanya. Adara 2021î de Sekreterê Pêroyî yê Unite The Unionî Tony Burkeyî pare kerd ke ê do kampanya geşêr bikerê. Teşrîna verêne de azadîya Ocalanî bîye rojdemo verên ê konferansê Unite The Unionî. Konferans de fotrografê Rayberê Şarê Kurdî ameyî akerdene.

Partîya Karkeran a Îngilîstanî zî konferansê xo de 28ê êlule de seba azadîya Abdullah Ocalanî veng da. Hemserekê Kampanyaya Ocalanî rê Azadîye Simon Dubbinsî, Baroness Christine Blowers, parlementer û Sereka Koma Dostanîya Bi Kurdan a Parlementoyî Lloyd Russel Moyle, parlementera Sînn Feînê Chrize Hazard, Hemsereka Meclîsê Şarî yê Brîtanya Elîfe Sarican û parlementerê HDPyî Hişyar Ozsoyî kombîyayîş de qisey kerd û vat ke heta ke Ocalan azad nêbo haştîye, demokrasî û azadîye nênê Tirkîya.

Sendîkayan 2021 de seba azadîya ocalanî îlanî dayî Newham Recorder, Saffron Walden Reporter, Inlington, Hackney Gazette, Hucknall Dispatch, The Gazette, The Guardian, Advertiser, Rasen Mail, Sunderlan Cho, Sleaford Standard, Visitor, The News Courier û The Bucks Beraldî.

Îtalya: Rêxistina kulturî ya çepgîra antîfaşîste ARCIy ke 4400 komeleyê ci estê kombîyayîşê xo de bire daye ke paştî bida kampanyaya azadîya Ocalanî û Kurdîstanî. Sendîkayanê Îtalya COBAS, CÛB û UNICOBASî çarçewa Kampanyaya 'Wextê ci ameyo, Ocalanî rê azadîye, Tirkîya rê edalet û haştîye' de NYyî rê mektube şawite.

Fakulteyê Zanistê Komelkî û Sîyasî yê Zanîngehê Calabria yê Îtalya ra û senatoyê akademîkî ra 74 profesor û doçentan paştî daye kampanyaya seba azadîya Rayberê Şarê Kurdî Abdullah Ocalanî. 74 akademîsyenan îmza daye kampanyaya 'Wextê ci ameyo; Ocalanî rê azadîye, Tirkîya rê haştîye û edalet.'' Akademîsyenan eşkerayîya xo de ard ziwan ke Abdullah Ocalan 22 serrî yo tecrîdkerde yo û dezgehê sey Konseya Ewropa, Mehkemeya Heqanê Merdiman a Ewropa û Komîteya Vergirewtişê Îşkenceyî (CPT) seba azadîya Ocalanî xîret nêkenê.

3ê nîsana 2021î de Şaredarîya Rende ya Cosenza ya ke pabesteyê herêma Gabrîa ya Îtalya ya hemwelatîya rûmete daye Abdullah Ocalanî. Serekê Şaredarîya Rende Marcello Mannayî qiseykerdişê xo yê meclîsê şarederî de vat: ''Ma pê nê qerarî muhîmîya heqanê merdiman ramojna. Vera binpaykerdişê heqan ê Tirkîya gama winayên hewce kerdêne. Konfederalîzmo demokratîko ke Abdullah Ocalan vano modelê komelêkê alternatîfî yo.''

11ê sibate de rojnameyê l1 Manîfesto de seba azadîya Ocalanî îlanêko pîl ame weşaneyene. Komîteya 'Wextê ci ameyo, Ocalanî rê Azadîye', Torra Komîteyanê Dostanîya Kurdîstanî û Îtalya û Buroyê Enfermasyonî yê Îtalya-Kurdîstanî no îlan da. Le Monde Diplomatique yê Îtalya zî bi îlanêkî kampanya weşanaye.

Almanya: Kampanyaya ke semedê azadîya Rayberê Şarê Kurdî Abdullah Ocalanî hetê Koma Xebate ya Kurdan a Afrîkaya Başûre (KHRAG) û Konfederasyonê Sendîkayan ê Afrîkaya Başûre (COSATU) ra 11ê çeleyî de ameye destpêkerdene vila bîye. Sibate de Almanya ra Meclîsê Şarî yê Tamil Eelamî yê Almanya, Ya-Basta-Netzwerk, Yewîya Wendekaranê Sosyalist Demokratikan (SDS) zî tede 10 rêxistinan da pêhesnayene ke ê zî tewrê Kampanyaya 'Wextê ci ameyo, Ocalanî rê Azadîye' benê. Dima Rêxistinê Ciwananê Keskan zî tede 17 dezgehanê bînan paştî daye kampanya û Çepo Têkoşer (Interventionistische Linke -IL)o ke 33 şaristananê Almanya de rêxistinbîyaye yo û tewr tay 1000 endamê ci estê, bi eşkerayîyêke tewrê Hemleya 'Wextê ci yo' bi. Rêxistinê sey Hetkarîya Sûre (Rote Hilfe), rêxistinê ciwanan Grune Jugend û Seebrucke pêser tewrê kampanya bîyî.

Rojnameyê Junge Welt de seba tewrbîyayîşê kampanyaya sendîkaya Îngilîstanî îlanêk ame dayene. Zanîngehê Potsdamî de teorîya neteweya demokratîke û konfederalîzmê demokratîkî, xoîdarekerdiş, xoserîya demokratîke ya Rayberê Şarê Kurdî bîyî babetê dersî. Sosyolog Oliver Schmidt Zanîngehê Potsdamî de na çarçewe de kursê bi nameyê 'Anarşîzm, Teorî û Pratîk: Mîsalê Rojawanî' da. 25 wendekaran nê dersan rê qeydê xo kerdî.

Swêd: Sendîkaya Merkezî ya Karkeranê Swêdî (SAC) serrgêra Komployê Mîyanneteweyî de eşkerayîye daye û seba azadîya Rayberê Şarê Kurdî veng da. Hunermend û sîyasetmedaranê Swêdî Antonio Guterresî rê seba azadîya Ocalanî mektube şawite. Wekîlê Partîya Çepe Daniel Riazat û hunermendê tîyatroyî Kemal Gorguyî zî mektubî şawitî. Riazatî mektube de bale ameye antene ser ke rewşa Ocalanî û Mandelayî manena pê.

Fînlandîya: Têgêrayîşê Ciwanan ê Çepgîran ê Fînlandîya (Vasemmistonuorte) pare kerd ke ê tewrê Kampanyaya 'Wextê ci yo; Seba haştîyêka têdûştî ya Tirkîya Ocalanî rê Azadîye' bîyî. Sekreterê Pêroyî yê Vasemmistonuorte Hanrik Jaakola Sekreterê Neteweyan (NY) ê Yewbîyayeyan Antonia Guterresî rê mektubêk erşawit.

Norweç: Rêxistinanê Partîya Sûre, Ciwanîya Sûre, Cîyayî Afernayîş û Paştdayîşê Kurdîstanî paştî daye ''Wextê ci yo'' û qerar girewt ke ê do Guterrsî rê metuban bişawê. Metube de venga Guterresî ame dayene.

Danîmarka: Rojnameyê Politikenî yê Danimarka îlanêk da û waştişê seba azadîya Rayberê Şarê Kurdî Abdullah Ocalanî pare kerd, paştî daye Kampanyaya 'Wextê ci yo'. Îlan de îmzaya wezîrê verênî yê karanê teberî zî tede îmzayê zaf kesî estê. Îlan de wina nusîyeno: ''Azadîya Cinîyan Azadîya Komelî ya. Eke Cinîyî Azad Nêbê Komel zî Azad Nêbenê''

Rojnameyê Jyllands-Postenî yê Danîmarka yo ke zaf yeno wendene de serrgêra komployê vera Rayberê Şarê Kurdî Abdullah Ocalanî de sey pêro pelî îlanê 'Ocalanî rê azadîye' ame weşanayene. Rojnameyo ke rojane hetê 20 mîlyon kesan ra yeno wendene de bale ameye antene serê tecrîdê serê Abdullah Ocalanî û derheqê hêrişê dewleta tirke yê ke bi polîtîkaya yewmerdimî ya Serekkomarê Tirkîya Erdoganî vera kurdan û muxalîfan yenê kerdene de zanayîşî dîyayî.

Swîsre: Parlamentera Federale ya Swîsre ya Partîya Sosyalîste Fehlmann Rielle Laurence 5ê gulane de derheqê tecrîdê vera Rayberê Şarê Kurdî Abdullah Ocalanî de vernîyazê bi serrnameyê 'Ganî ma lîderê kurdan tecrîdî ra vejê' pêşkêşê Meclîsê Federalî kerd. Wekîlan rottaz Brigitte Dandrès, Christian de la Reusille, Denis Fridez, Pierre-Alain Friedl, Claudia Funiciello, Tamara Gysi, Barbara Locher, Benguerel Sandra, Marti Min Li Molina, Fabian Munz, Martina Pillier Carrard, Valérie Prezioso Batou Stefania, Plut Jon, Schneider Schüttel Ursula îmza daye vernîyazî. Vernîyaz de wina ame vatene: ''Ganî Konseya Federale seba wedaritişê tecrîdê Îmraliyî têbigêra. Konseya Federale seba bisînorkerdişê bazarîya bi Tirkîya xebatî kerdêne. Ganî Tirkîya derheqê babeta tecrîdî de bêra şîyarkerdene.'' Rojnameyê karkeran a Sendîkaya Unia de seba azadîya Ocalanî îlanêk weşanîya.

Fransa: Rojnameyê La Marseillaise de manşetî ra seba azadîya Rayberê Şarê Kurdî Abdullah Oacalanî îlanêkê bi 4 rîpelan ame dayene.

Avusturalya: Rojnameyê The Sydney Morning Heraldî de kampanyaya seba azadîya Abdullah Ocalanî û Kurdîstanî ameye îlankerdene. Îlan de posterêko pîl ê Rayberê Şarê Kurdî şuxilîya. Rayberîya Federasyonê Komelê Kurdan ê Demokratîkî yê Avusturalya (DKTF), Amnesty Internationalî de Partîya Karkeran, Partîya Keskan û Partîya Lîberale kombîyayîşêk kerd û tecrîdê Îmraliyî kerd rojdem. Înan bire daye ke rewşa Ocalanî berê rojdemê parlamentoyê Avusturalya.

Gana: Rêxistina Yewîya Projeyanê Komelkîyan ê Afernayoxan (ACCP) ya Gana zî eşkera kerd a tewrê kampanyaya 'Ocalanî rê azadîye' bîye. ACCPyo ke 2008 de ame ronayene 2013î ra nata wayîrê statuya Konseya Ekonomîk û Komelî ya Neteweyê Yewbîyayeyî (NY) yo. Serekê ACCPyî John Nana Yaw Okyereyî bi nameyê rêxistina xo çarçewa kampanyaya ''Wextê ci yo: Abdullah Ocalanî rê azadîye'' de Sekreterê Pêroyî yê Neteweyanê Yewbîyayeyan Antonio Guterresî rê mektubêke nuşte.

Ekvator: Paytextê Ekvatorî Quito de emser fûarê kitaban ê 3 rojan de kitabê Rayberê Şarê Kurdî Abdullah Ocalanî û ronayoxa PKKyî Sakîne Cansiz resayî wendoxan. Merkezê Kulturî yê fûarî de seba şermezarkerdişê tecrîdê vera Rayberê Şarê Kurdî afîşî ameyî daliqnayene. Semedo ke tarîxê fûarî de Newroze zî estbî warê merkezî de adir ame tavistene û govende ameye girewtene.