Artêşa tirke ya îşxalkere 17ê nîsane de vera Herêmanê Pawitişî yê Medya hêrişê îşxalî newe ra dayî destpêkerdene.

Wezîrê Pawitişî yê Tirkîya Hulusî Akarî îlan kerd ke înan bi nameyê 'Pençe-Kilit'î vera Metîna, Zap û Avaşînî hêrişê îşxalkerî dayê destpêkerdene.  Nê îlankerdişî ra verî 15ê nîsane de Serekwezîrê Herêma Kurdîstanî Mesrûr Barzanîyî Erdoganî reyde pêvînayîşêk kerd. Xora ameyêne zanayene ke PDK ho mîyanê amadekarîya hêrişanê dewleta tirke de yo. 

Artêşa tirke ya îşxalkere 2021 de vera Garê, Metîna, Zap û Avaşînî hêrişê îşxalî kerdî la raştê xoverdayîşê tarîxî yê gerîlayanê HPG û YJA-Starî ameye. Gerîlayanê ke destekê şarê kurdî girewt, hêrişê kîmyewî û teknolojîkî yê dewleta tirke şiknayî.

Binkewtişo verên ê dewlete: Garê

Verî ma çim bierzê prosesê verî û dimayê Operasyonê Garê ke sibata 2021î de dîya destpêkerdene û armancê ci qedînayîşê têgêrayîşê kurdan û gerîlayan bi.

Dewleta tirke 10ê sibata 2021î de hêrişê Garê kerd û no sey 'operasyonê xelisnayîşê rehîneyan' mojna. Pê nê hêrişan înan waştêne ke Garê îşxal bikera. Çunke operasyonê xelisnayîşê rehîneyan pê bomba, çeka kîmyewîye û topan nêno kerdene.  Dewleta tirke hêrişê vera Garê de raştîya ke nêpawitêne de têrî bîye. Gerîlayan nêverda ke artêşa îşxalkere nefes zî bigêra, leşkerê ke helîkopterî ra ameyî warardene tanêameyî ke têbigêrê. Seba ke şertê hewayî qey artêşa îşxalkere weş bîyî îşxalê Garê 10ê sibate de dîyabî destpêkerdene û dewleta tirke waştêne 15ê Sibate de ke serrgêra Komployê Mîyanneteweyî bîye serfîrazîya xo îlan bikera. La hema helanê verênan de planê înan sercêr bîyî. Roja diyîne de rewşe seba îşxalkeran bîye giranêr. 14ê sibate de hewa varayîş bi û îşxalkerî rojêke verî 'nişka ra' remayî şîyî. Netîceya hêrişî de dewlete 12 leşker, polîs, endamê xo yê MÎTî û hemwelatîyêkê Başûrî kiştî. Hêrişê îşxalî yê vera Garê 3 rojan de vurîya xoverdayîşêko tarîxî. 16ê sibata 2021î de HPGyî rayaumûmîya dinya rê bi eşkerayîyêke da zanayene ke Garê de 15 gerîlayî şehîd bîyî û kampe de hema zî rêçê çeka kîmyewîye estê, ê nêeşkenê debikewê zereyê şikefteyan.

Binkewtişê xo yê Garê ra dima Wezîrê Pawitişî yê Tirkîya Akarî Meclîs de 'qiseykerdişê agahîdayîşî' de îtîraf kerd ke nînan gazo kîmyewî xebitnayo. Akarî vat: ''Têna gazê çimvêşnayîşî şuxilîya.'' Akarî xo vîr a kerdbi ke Rêxistina Qedexekerdişê Çekan ê Kîmyewîyan (OPCW)ya ke Tirkîya zî endama ci ya 1997 ra nata gazê çimvêşnayîşî zî tede pêro tewirê gazê bi madeyê kîmyewî warê leşkerîye de qedexe kerdbî.

Konseptê şerî bi israrî dewam kerd

Binkewtişê Garê ra dima şewa 23-24ê nîsane yewinanê artêşa tirke vera waranê gerîlayan ê bi nameyê Herêmanê Pawitişî yê Medya hêrişê îşxalî dayî destpêkerdene. Artêşa îşxalkere wina plan kerdêne ke cayanê stratejîkan ê gerîlayan Metîna, Avaşîn û Zap de leşkeranê xo hewayî ra bîyara war û nê herêman îşxal bikera. Gerîlayanê HPG û YJA-Starî vera nê xîretê îşxalî Hemleyê Şorişgêrî yê Bazanê Zagrosî û Cengê Xabûrî dayî destpêkerdene. Ame tesbîtkerdene ke 10 rojanê verênan ê nê şerî de bi hawayêkê giranî artêşa îşxalkere 9 reyî gazo kîmyewî û jehrîn şuxilnayo. Artêşa tirke rixmo ke verê çimanê pêro dinya de sûcê şerî kerdêne warê mîyanneteweyî de raşta qet yew hîşyarî û ambargoyî nêameye coka no metodo gemarin kerd mende. La gerîlayan Metîna, Avaşîn û Zap de pê îmkananê xo yê kêman xoverdayîşêko bêhempa kerdêne. 

Xoverdayîşê Mamreşo, Girê Sorî û Werxelê

Dewleta tirke operasyonê 23ê nîsane de verî warê Mamreşoyî yê Avaşînî kerd hedef. 7 gerîlayan serkêşîya Fermandar Serhat Giravî (Kamuran Alpsar) de Girê Şehîd Munzurî de 10 rojan bi çêrî xo ver da. 7 gerîlayan zereyê tunelêkî de derbî dayî artêşa îşxalkere ro.

6-8ê gulana 2021î de warê Aris Farisî yê Avaşînî de 3 rojan gerîlayan vera artêşa îşxalkere xo ver da. Tîya de 5 gerîlayî pê çekanê kîmyewîyan ameyî şehîdkerdene. Girê Sorî de zî xoverdayîşê gerîlayan bi mengan dewam kerd û 15ê êlula 2021î de artêşa tirke vera nê gerîlayan bi giranî çekê kîmyewîyî xebitnayî.

Tîpê neweyî yê çeka kîmyewîye şuxilîyayî

Dewleta tirke dima ke pê xoverdayîşê gerîlayan nêeşkaya muracatê çekanê kîmyewîyan ê qedexekerdeyan kerd ke mîyanê înan de tîpê neweyî est bîyî. Ê rojan de Hemserekîya Konseya Rayberdişî ya KCKyî pêro dinya rê deklare kerd ke dewleta tirke çekanê kîmyewîyan 5 mengî yo şuxilnena la Neteweyê Yewbîyayeyî, Amerîka û Ewropa vera ney bêveng ê.

Artêşa tirke 2ê êlule de vera tunelanê şerî yê Werxelê 7 reyî gaz û çekê kîmyewîyî şuxilnayî la nêeşkaye gerîlayan tasfîye bikera. 3ê êlule de gerîlayanê YJA-Starî pê çalakîyêka mîyandekewtişî 5 leşkerê tirkî kiştî. 4ê êlule de artêşa îşxalkere 17 reyî hêrişê Werxelê kerd la seba ke reyna netîce nêgirewte çekê kîmyewî yê giranî şuxilnayî. 5ê êlule de Werxelê de 5 gerîlayî bombardumananê kîmyewîyan de şehîd bîyî.

PDKyî xozaya Kurdîstanî pêşkêşê îşxalkeran kerde

Dewa Hirorî ya qezaya Berwarî ya Başûrî de xeylêk kesî tesîrê bombardumananê kîmyewîyan ra nêweş kewtî. La PDKyî nêverda ke zerarê nê hêrişan bêrê tesbîtkerdene. Hetê bînî ra hêrişanê dewleta tirke ra Başûr de 84 şewatî vejîyayî, 47 dewî ameyî vengkerdene, 60 dewan de darî birîyayî û zerar resa xeylêk bax û baxçeyan ser. PDKyî seba nê kerdişan paştî daye dewleta tirke. Nêrazîbîyayîşê şarê Başûrî ra dima Sersefîrê Tirkîya yê Hewlêrî Hakan Karaçayî 'da zanayene' ke înan ê erazîyî hêrînayî.

Bîlançoya 2021î seba dewleta tirke giran bîye!

Rixmê hende kerdişan zî dewleta tirke ya îşxalkere pê gerîlayan nêeşkaye û neçare mende ke xo apey bigêra.  Goreyê Fermandarîya Qerargehê Merkezê Pawitişê Şarî (MPŞ) dewleta tirke 2021 de 2 hezar 25 hêrişê hewayî, 426 obus-hawan û 367 hêrişê çekanê kîmyewîyan kerdî. Netîceya nê hêrişan de 298 gerîlayî şehîd bîyî. Gerîlayan vera îşxalkeran 742 çalakîyî kerdî û nê çalakîyan 861 leşkerê tirkî ameyî kiştene.

Şarê kurdî dormeyê xoverdayîşî de kom bi

Şarê kurdî û dostanê înan 2021 de vera hêrişanê îşxalî dormeyê xoverdayîşê gerîlayan de kom bi û sere de Ewropa de her cayê dinya de çalakîyî kerdî, sûcê dewleta tirke teşhîr kerdî.

Xûlasa; Zap, Metîna û Avaşîn de xoverdayîşê destanwarîyî yê gerîlayan mîrasêko bêhempa verda. Fedayîtîya şehîdan û çalakîyanê şarê kurdî kerd ke hêrişê îşxalî yê 2021î pûç bibê.