Her serre serebûtê tecawuz û îstîsmarê leşkeran û polîsan ê tirkan ê vera kurda xo mojnenê ra. Înan ra tewr zaf îstîsmarê Zîndanê Pozanti ez dejnabî. Zîndanê Pozanti de domanê kurdî maruzê tecawuz û tacîzan mendbî. O çax seke medya de dîyabi zanayene îstîsmarkeran bi zorî kerdêne ke domanê kurdî lew panê alaya tirkan û seba ke nê domanî 'terorîst' bîyî heq kerdêne ke ci rê tecawuz bikerê. Reyna Mêrdîn de domana 13 serre ya bi nameyê N.Ç. bi hawayêkê sîstematîkî maruzê tecawuzê 26 kesan mendbî. Nê 26 kesî zafêr leşker û selahîyetdarê dewlete bibî. Reyna serra 2013î de domanêka 16 serre maruzê tecawuzê 6 çawişê pisporî mendbî. Heyfo ke tecawuzê winasênê ke faîlê ci leşker û hêzê dewlete yê, zêdêr ê. Nê rojanê peyênan de zî rojdemê Kurdîstanî de çekuyê tecawuzê vera domanan û leşkeran yenê têhet.

Her çî ra verî gereka nê serebûtê ke Kurdîstan de tim qewimîyenî têna sey waqaya edlîye nêrê ercnayîş. Çunke Kurdîstan binê îşxalî de yo. Nê tecawuzkerî zî îşxalker ê. Goreyê qanûnê fetîhê tirkan (!) mal, namus û ganê dişmenan helal ê. Nê îşxalkeran bi serran pêro cayan de ke îşxal kerdî tecawuzkerdişê cinîyan xo rê sey heq dî. Seba naye 'pîlanê' xo ra fetwa girewte, destûr girewt. Pîr û kokimanê înan bi serran Ewropa, Afrîka û Balkanan ra cinî û domanî remnayî, bazaran de rotî, haremanê xo de hepîs kerdî, keyeyanê xo de esîr kerdî.

Wayîrê na hîşmendîye ewro Vakur û Rojawanê Kurdîstanî de tecawuzê doman û cinîyan kenê. Senî ke DAÎŞî bi hezaran cinîyî seba êzidî yê kafir (!) ê esîr kerdî, ê zî ewro Efrîn de, Serêkanîyê de, Êlih de, Şirnex û Mêrdînî de doman û cinîyan îstîsmar kenê. Xora mabênê DAÎŞ û dewleta tirke de qet ferqêk çin o. Her çiqas cinî û domanê kurdî xo rê vajê 'misilman' zî seba înan misilmanîye pê tirkbîyayîşî bena temam. Leşker û polîsê tirkan cinî û domanan rê tecawuz kenê, vanê ma rê heq û helal o. Selahîyetdarê tirkan zî eke eşkera bibo ceza nêdanê înan, vanê şima rê heq û helal o.

Hetê bînî ra na mesele de nêzdîbîyayîşê dezgeh û rêxistinanê kurdan zî problematîk o. Tecawuzê vera cinîya îzmîrije û tecawuzê vera cinîya mêrdînije heman çi nîyo. Bêşik û bêguman tecawuz sûcêko merdimîye yo û çîyêk zî nêeşkeno nê sûcî şenik bikero. La Kurdîstan de tecawuz û îstîsmar sey heq dîyayeno, normalîze beno. Coka gereka dezgeh û rêxistinanê ma pê na hîşmendî biewnê na mesele û hetê gemarinî yê nê srebûtan eşkera bikerê. Fuhuş çira Kurdîstan de hendek zêdêr o, leşker û polîsî senî hende rehet xo resnenê nê domanan; gereka bale xo bidê nê persan ser. Gereka îfade, vatiş û sloganê têkoşînê vera tecawuz û îstîsmarî bivurîyê.

Çew nêeşkeno fekê xo abikero û vajo ke hayîya dewlete pê tecawuzanê Zîndanê Dîyarbekîrî çinbî yan zî dewlete xîret kerd ke nê tecawuzan asteng bikera. Dewlete bi xo Zîndanê Dîyarbekîrî de tecawuz teşwîq kerd, tecawuz sey metodê îtîraf û îmha xebitna. Dewlete ra ber kam eşkeno meseleya Gulîstane Doku mîyan bikero? 5 çawişê tecawuzkerî senî vera dîyayî?Welhasil tecawuz seba leşker û polîsanê ci mîrasê dewleta tirke yo.