Qirkerdişê Ronoskî ra ke 19ê înan domanî 34 kesî bi bombardûmana teyarayanê şerî yê TSKyî ameyî kiştene 8 serrî vîyartî. La hema zî sucdarî nêameyî dîyene û hukmkerdene. Bi nê hewayî yeno watene ke qirkerdiş bêro vîrrakerdene.

Tedaya dewleta tirke ra serra 1993ê ra dima zaf dewê Kurdîstanî ameyî talankerdene û vengkerdene. Dewa Zêvî ya ke sînorê Herêma Federale ya Başûrê Kurdîstanî ser o ya zî înan ra yew a. Hemwelatîyê Zêvî zî seba ke waştişê dewlete nêardî ca, natorîye nêkerd, dewa înan zî hetê dewleta tirke ra ameye vengkerdene û dewijan bi rojan qereqolan de îşkence dî. Îşkenceyê bi rojan ra dima dewijan rê ame şertkerdene ke dewe veng bikê û şorê nêzdîyê dewa Roboskî. Dima tay dewijan verê xo da Herêma Federale ya Başûrê Kurdîstanî û tay dewijanê bînan zî nêzdîyê dewa Roboskî de ca da xo. Seba ke pêro erdî ser o mayînî amebî ronayene dewijî nêeşkayê zîret bikê û dest pê bazirganîya serê sînorî kerd.

Sînorê Mergî...

28ê kanûna 2011î de 19ê înan domanî 34 hemwelatîyê dewa Roboskî yê qezaya Qilebanî ya Şirnexî hetê teyarayanê şerî yê F-16î yê TSKyî ra ameyî bombavarnayene û qetilkerdene. Berpirsîyarê qetlkerdişê 34 kesan nêameyî dîyene. Coka yeno waştene ke berpirsîyarî bêrê nimnayene û dosya bêra padayene. Kesê ke kewenê dosya dima yenê destbendkerdene û derheqê înan de tehqîqat yeno akerdene.

Provaya Qirkerdişî Ameyebî Kerdene

Qirkerdişê Roboskî ra serrêke verî 2010î de provaya qetilkerdişî ameyebî kerdene. Hamnanê 2010î de helîkopteranê Skorkî û Kobra hemwelatîyanê ke bazirganîya serê sînorî kerdêne ser o bambayî varnayî.Naye ser o roboskîyîjê ke hawarê hemwelatîyan ser o şîbî cayê bombardûmanî hetê naroran û leşkeran ra amebî gulepanayene.

Domanan Ser o Bombayî Varayî

28ê kanûna 2011î de bêvengîya şewe bi vengê bombayan ê ke sînorê nêzdîyê dewa Roboskî ra ameyêne xera bîye. 19ê înan domanî 34 hemwelatijan ser o ke bazirganîye serê sînorî ra agêrayêne teyarayanê şerî yê F-16î yê TSKyî bombayî varnayî û ê  qetil kerdî. Qirkerdiş saete 21:20 de hetê 4 teyarayanê şerî ra ame kerdene, xebera qereqolê leşkeran zî tira estbî. Servet Encu yo ke qirkerdiş ra xelisîyabî xebere daye dewijan. Çend saetan ra dima çapemenîya azade serebûtî da zanayîşê rayaumûmîye.

Medayaya Îqtîdarî Sey Qeza Nîşan Da

Wexto ke qirkerdiş ame kerdene medyaya îqtîdarî qasê 12 saetan ca nêda serebûtî. Selahîyetdaranê hukmatî no serebût rojdemê xo nêkerd. Medyaya îqtîdarî serebût sey ''qeza'' mojna. La seba ke medyaya kurdan serebût kerd rojdem û her cayê dinya de vila kerd, serebûr kewt rojdemê Tirkîya zî. O çax tay medyayanê pabesteyê hukmatî û dewlete sernameyê winasênî rojnameyanê xo de xebitnayî:

Milliyet: “35 kes merdî. Ma zaf xemgîn ê."

Sozcu: “Çekî kiriştêne"

Bugun: “Facîaya îstîxbaratî"

Haberturk: “ Sînor ser o şaşîya şêneyî"

Takvim: “Teyaraya bêmerdime ya bêînsafe"

Vakit: “Terorîst ê yan qeçaxçî yê?"

Yenişafak: “Şaşîya ke kişt"

Radikal: “35 hemwelatijî bi bombaya ÎHA ameyî kiştene"

Aydinlik: “Operayonê hewayî yê TSKyî de 25 hemwelatîyî ameyî kiştene" û “Operasyon bi îstixbaratê DYA ame kerdene"

Star: “Teyarayanê F-16î Vakurê Iraqî de hedefê xo şaş kerdî: 35 kesî merdî.'' ''Şaşîye qehr kena''

Zaman: “Sînorê Vakurê Iraqî de 35 hemwelatijan wefat kerd'' û ''Îstîxbaratî kişt''

Vatan: “Vatêne PKKyîj ê, 35 hemwelatijî ameyî kiştene''

Guneş: “Uludere rê 123 hezar TL, şehîd rê 50 TL tazmînat'' û ''Wa leşker se biko''

Sabah: “Qileban de PKK ra ber hêzêk esto'' û ''Sendromê Gediktepe rastê qeçaxçîyan ame''

Bedenê Qijkekî Parçe Parçe Bîyî

Hemwelatîyî û merdimê ke xebera qirkerdişî girewt şîyî cayê qirkerdişî û rastê cenazeyan ameyî ke perçe perçe bibî. Dîmenê ke perçeyê merdiman vêşîyabî û sey cenazeyêke pîya amebî komkerdene hetê çapemenîya kurdan ra pêşkêşê medayay dinaya ameyî kerdene û barbarîye hîna zêde vejîyaye meydan.

Serekê AKPyî Leşkerî Fîraz Kerdî

Serekwezîrê ê wextî Recep Tayyîp Erdoganî derheqê serebûtî de Serfermandarê Artêşe û leşkeranê bînan rê sipas kerd û ê fîraz kerdî. Hetkarê Serekê AKPyî Huseyîn Çelîkî serebût sey ''qelsîye '' nîşan da.

Serdozgerê Komare Bira Bêtaqîbîye Daye

Serdozgerê Komare yê Qilebanî derheqê dosyaya qirkerdişî de bira ''bêtaqîbîye'' daye. 5ê tebaxa 2012î ra dima Serdozgerê Komare yê Amedî dest pê tehqîqatî kerd. Serdozgerê Komare yê Amedî 11ê hezîrana 2013î de zî semedê ''Bi zanayîşî bîyî semedê kiştişî'' ra bira bêkardayîşî da û dosya erşawite Mehkema Leşkerî ya Serfermandarîye. Mehkema Leşkerî 7ê çileyê2014î de bira bêteqîbîye daye. Îtîrazanê keyeyanê Roboskî ser o 18ê temmuza 2014î de keyeyan muracatê Mehkema Qanûnê Bingeyî da. AYM wezaretê Edaletî ra pawitiş waşt. AYM seba ke kêmasîyê dosya nêameyî tememkerdene muracatê keyeyan 16ê sibata 2016î de red kerd. Keyeyan na reye muracatê Mehkema Heqanê Merdiman a Ewropa (TMME) kerd.

Walîtîye Destûr Nêda Ke Dewa Bêra Akerdene

Seba ke serebût bêro cigêrayene Meclîs de Komîsyonê Cigêrayîşê Heqanê Merdiman ê Meclîsî yê Qilebanî ame awankerdene. Meclîsî eşkera kerd ke dîmenê Heronî zaf zelal ê û 34 kesî bi hawayêkê eşkera ameyî kiştene. La reyna zî netîceyêk nêame girewtene. Fermnadarîya Qereqolê Gulyazî xîretê hukmkerişan ra dima venga birîndaranê Roboskî Davut, Servet û Hacî Encu da û waşt ke derheqê ''îhlalkerdişê sînorî'' û ''qaçaxîye'' de îfade bidê. BDPyî 26ê çelê de muracatê Mehkema Ceza ya Mîyanneteweyîye da. La reyna zî netîce nêgirewt. Parlamentera HDPyî ya Şirnexî Aycane Îrmez persname da û persname de çekuya ''qirkerdişî'' sey birîn ameye mojnayene.

Komeleya Roboskî Ameye Girewtene

Keyeyanê Roboskî seba edaletî Komeleya Roboskî saz kerde. La komele 6ê çeleyê 2017î de bi KHK ameye girewtene. Qeyûmê Şaredarîya Peyasî heykelê Parka Peyasî ya Roboskî wedarit. Parlamenterê HDPyî yê Şirnexî û merdimê 34 kesanê ke Qirkerdişê Roboskî de ameyî qetilkerdene ame tepiştene. Pawitoxê heqanê merdiman Yannis Vasilis Yaylali û Meral Geylanî yê ke seba ke Qirkerdişê Roboskî bêro roşnkerdene cigêrayîş kerdene ameyî tepiştene. 24ê gulane de polîsan eşt keyeyê Velî Encuyî ser û o tepişt.

Qirkerdişê Roboskî Sey Qebe û Nêweş Ame Dîyene

16ê gulana 2019î de seba roşnkerdişê Qirkerdişê Roboskî pêşnîyazê cigêrayîşî yê Parlamenterê CHPyî Sezgîn Tanrikulu hetê Serekîya Meclîsî ra sey ''Qebe û Nêweş'' ame dîyene û pêşnîyazê Tanrikuluyî ame redkerdene.

8 Serr ê Gêrenê Edaletî

Keyeyê Roboskî 8 serrê yê ke gêrenê edaletî. 5ê sibata 2019î de keyeyê Roboskî şîyî zîyaretê Leyla Guven ke seba grevê vêşanîye paştî bidê ci.

19ê ci domanî 34 kesê ke Qirkerdişê Roboskî de hetê bombayanê teyarayanê şerî yê TSKyî ra amebî qetilkerdene wina yê:

Karker Encu: Wexto ke ame qetilkerdene 16 serre bi. Dima ke dibistana mîyanêne qedîna rewşa ekonomîke ra dest pê bazirganîya sînorî kerd.

Seyîthan Encu: Wexto ke ame qetilkerdene 21 serre bi. Seyîthan wendekarêko serkewte bi. La rîye feqîrîye ra dibistane ca verde. Wextêk Îstanbul de xebitîyo. Seba ke keda destê xo nêgirewte agêra Roboskî bira daye ke bazirganîya sînorî biko. Seyîthan bazirganîya xo ya yewîne de bi hedefê bombayanê TSKyî.

Nadîr Alma: Wexto ke ame qetilkerdene 17 serre bi. Nadîr domanîya xo ra anta hetê dormeyê xo ra ameyêne naskerdene. Seba ke di birayê ci leşkerîye kerdêne neçare mend ke debarê keyeyê xo biko. Coka sey zaf domananê Roboskî verê xo da bazirganîya sînorî.

Mehmet Alî Tosun: Wexto ke ame qetilkerdene 24 serre bi. Mehmet wextêk Iraq de xebitîya. Dima agêra Roboskî. Mehmet Alî dewe de nêşkîya kar bivîno û dest pê bazirganîya sînorî kerd. Seba ke qatirê ci çinbi embazê xo ra qatirê ey kîra kerd û şi ver bi sînorî.

Şervan Encu: Wexto ke ame qetilkerdene 19 serre bi. Şervan dima ke dibistane ra fek vera da, şi Îstanbul. Dima bi israrê keyeyê xo agêra Roboskî. Şervan bi qatirê xo ge eg şîyêne ver bi sînorî. Wexto ke ame qetilkerdene qetirê ci ra ame şinasnayene ke Şervan ci ra zaf heskerdene.

Nevzat Encu: Wexto ke ame qetilkerdene 19 serre bi. Newzat hem futbol ra hem zî wendiş ra zaf hes kerdêne. Ge ge babîya xo reyde şîyêne bazirganîya sînorî zî. Wexto ke ame qetilkerdene sinifa peyêne ya lîse de bî.

Osman Kaplan: Wexto ke ame qetilkerdene 31 bi. Zewijnaye û babîyê 5 domanan bi. Osman seba ke miqatê keyeyê xo, domananê xo û birayanê xo yê sêwiran bibo şi ver bi sînorî û hînî anêgero.

Ozcan Uysal: Wexto ke ame qetilkerdene 18 serre bi. Ozcan ge ge şîwanîye kerdêne ge ge zî şîyêne ver bi sînorî. Ozcan şîwanîye ra û koyan ra zaf hes kerdêne. Dima ke şi ver bi sînorî mabênê koyan de wefat kerd.

Selîm Encu: Wexto ke ame qetilkerdene 39 serre bi. Zewijnaye û babîyê 3 domanan bi. Selîm yew ewladê keyeyî bi û seba ke debarê keyeyê xo biko şîyêne ver bi sînorî. Selîm wayîrê di domananê astengkerdeyan bi. Wexto ke ame qetilkerdene cin3iay ci diganî bibî.

Vedat Encu: Wexto ke ame qetilkerdene 18 serre bi. Vedat hamnanan de operatorîya makîneya karî kerdêne zimistanan de zî şîyêne ver bi sînorî.

Muhammet Encu: Wexto ke ame qetilkerdene Wendekarê sinifa 7. bi. Keyeyê xo ra israr kerd ke embazanê xo reyde şoro sînorî.

Mahmsûm Encu: Wexto ke ame qetilkerdene 17 serre bi. Wendekarêko serkewte bi. Seba ke mesrafê ehlîyetê wesayîtî peyda biko şi ver bi sînorî. Sey embazanê xo yê bînan sînor ser o wefat kerd.

Bîlal Encû: Wexto ke ame qetilkerdene 16 serre bi. Seba ke babîyê ci astengdar bi debarê keyeyî kerdêne. Roja ke ame qirkerdene dibistane ra agêrabi, kincê xo vurnabi û şibi ver bi sînorî.

Erkan Encu: Wexto ke ame qetilkerdene 13 serre bi. Erkan sinifa 7. de bi. A roje wexto ke dibistane ra agêra kincê xo vurnayî û şi bazirganîya sînorî. O şîyayîşê ci yo diyîn ê peyên bi.
 

Husnu Encu: Wexto ke ame qetilkerdene 20 serre bi. Kekê şîyêne sînorî la seba ke o şibi leşkerîye hînî o şîyêne sînorî. Zewijnaye bi. Nêwaştêne şoro sînorî. Wexto ke ame qetilkerdene cinîya dicanî bîye.

Savaş Encu: Wexto ke ame qetilkerdene 14 serre bi. Seba ke nêeşkîyo ziwanê tirkî bimuso dibistane war verda û dest pê şîwanîye kerd. Kutikê xo ra zaf hes kerdêne. Wexto ke ame qetilkerdene kutikê ci dewe terikna û anêgera.

Cîhan Encu: Wexto ke ame qetilkerdene 19 serre bi. Babîyê ci nêweşîyêkî ra merdibi. Debarê keyeyê xo bi bazirganîya sînorî kerdêne.

Cemal Encu: Wexto ke ame qetilkerdene 17 serre bi. Her roje seba dibistane 5 kîlometre rayîr şîyêne û waştêne bibo mamosta. Seba mesrafa dibistane şi bazirganîya sînorî.

Serhat Encu: Wexto ke ame qetilkerdene 15 serre bi. Seba ke 2 birayanê ci Zanîngeh de wendêne ey debarê keyeyî kerdêne. Wexto ke reya peyêne kekê xo de qisey kerd kekê ci vat pereyê ci çin o ke abigêro dewe. Serhatî vat o do ci rê bazirganîya sînorî ra dima bierşawo. Serhat a roje ame qetilkerdene.

Hamza Encu: Wexto ke ame qetilkerdene 21 serre bi. Dima ke dibistane war verda şi teberê şaristanî de xebitîya. Bi israrê dadîya xo amadekarîya zewajî kerdêne.

Celal Encu: Wexto ke ame qetilkerdene 15 serre bi. Dima ke dadîya ci 2008 de merde zaf dej ant. Dibistane ra zaf hes kerdêne la feqirîye ra şi sînorî.

Şerafettîn Encu: Wexto ke ame qetilkerdene 18 serre bi. Domanîya xo de dadîya ci merde. Hem miqatê babîyê xo hem zî way û birayanê xo bîyêne. Seba ke debarê keyeyî biko şi sînorî. Wexto ke ame qetilkerdene hetê dadîya xo de ame definkerdene.

Selam Encu: Wexto ke ame qetilkerdene 22 serre bi. Wendekarê sinifa peyêne ya zanîngehî bi. Seba pereyê kitabanê xo muracatê Qeymeqamîye kerd. Qeymeqamî ci rê vat ''Bê mi reyde bixebite''. Seba ke sewbîna çareya ey nêmende şi sînorî.

Bedran Encu: Wexto ke ame qetilkerdene 13 serre bi. Serra xo ya qijkeke de bi dest û lingê babîyê xo yê astengdarî. Seba ke way û birayanê xo rê solan bihêrîno babîyê xo reyde şi sînorî.

Fadil Encu: Wexto ke ame qetilkerdene 20 serre bi. Futbol ra zaf hes kerdêne û terefgîrê Fenerbahçe bi. Formaya Fenerbahçe tim ci ser o bi. Wexto ke ame qetilkerdene babîyê ci o formaya ci ra şinasna.

Huseyîn Encu: Wexto ke ame qetilkerdene 20 serre bi. 6 serrî bîyî ke şîyêne sînorî. Seba debarê keyeyê xo şîyêne sînorî û hetê TSK ra ame qetilkerdene.

Aslan Encu: Wexto ke ame qetilkerdene 17 serre bi. Her wext kekê xo Xelîlî reyde şîyêne sînorî. Dima ke kekê ci mayîn ra merd kar mend milê ci ser.

Şivan Encu: Wexto ke ame qetilkerdene 13 serre bi. Seba ke babîyê ci Şivan Perwer ra zaf heskerdêne nameyê ci na Şîvan. Reya verêne şibi sînorî û ame qetilkerdene.

Orhan Encu: Wexto ke ame qetilkerdene 21 serre bi. Bi rîyê xo yê hûyayeyî namdar bi. Wexto ke nêşîyêne dibistane embazê ci ameyêne û o pers kerdêne. Seba ko coverse bihêrîno kekê xo Zeydan reyde şi sînorî.

Zeydan Encu: Wexto ke ame qetilkerdene 25 serre bi. Seba ke debarê keyeyê xo biko birayê xo Orhan reyde verê xo da sînorî û bi bombayanê TSKyî ame qetilkerdene.

Salîh Encu: Wexto ke ame qetilkerdene 16 serre bi. Salîhî her tim waştêne ke şoro bazirganîya sînorî la babîyê ci destûr nêdayêne. A roje wexto ke dibistane ra agêra tewrê embazan3e xo bi û verê xo da sînorî.

Yuksel Urek: Wexto ke ame qetilkerdene 21 serre bi. Yukselî kewokan û kewan ra zaf hes kerdêne. Ge ge tamîrkarîye kerdêne ge ge şîyêne bazirganîya sînorî.

Adem Ant: Wexto ke ame qetilkerdene 19 serre bi. Ademî amadekarîya veyve kerdêne û seba ke mesrafê veyve peyda biko şîyêne sînorî.

Salîh Urek: Wexto ke ame qetilkerdene 18 serre bi. Yarîyan ra û viraştişê resiman ra hes kerdêne. Feqîrîye ra verê xo da sînorî.