Şarê Mexmûrî yo ke binê şertanê zehmetan de xover dano 10 mengî yo binê ambargoyî de yo. Na beşê dosya de ma ambargoyê 311 rojan genê dest.

Asayîşê PKDyî 17ê temmuza 2019î de Mexmûr ra ameyîşê Hewlêrî qefilna. Sebebê ci hema zî sey fermî nêameyo eşkerakerdene. Şarê Mexmûrî 311 rojî yo hetêkî ra binê şertanê zehmetande xover dano hetê bînî ra vera vîrusê Korona têkoşîn keno.

Ambargo leteyêkê konseptê şerî yo

Kampa Mexmûrî sey leteyêkê planê şerê dewleta tirke bi serran o binê  hêrişî de ya. Gama ke dewleta tirke hêrişê Têgêrayîşê Azadîye yê Kurdan û destkewteyanê kurdan kena vera  Kampa Mexmûrî zî hêrişî zêdîyenê. Ambargoyê PDKyî zî leteyêkê planê îşxalê dewleta tirke yo. Bi serran o şarê Mexmûrî binê kontrol û çimdarî de yo û PKD ci rê zext keno. Mexmûrijî bîlasebeb  esîr ameyî girewtene  û hema zî zîndananê PKDyî de yê. Şarê Mexmûrî heta ewro hema çirey vera vera Hukmatê Herêmê Kurdîstanî û Iraqî çîyêko xelet nêkerd. Şarê Mexmûrî yo ke herême çeteyanê DAÎŞî ra zî xelisna vano ke ê do çirey teslîm mebê.

Çalakîyê şarî

Mayanê Haştîye yê Mexmûrî û Mayanê Laçiksipîyan 1ê êlula 2019î de vera ambargoyî nuqtaya kotnrolî de çalakîya roniştişî da destpêkerdene. Çalakîya mayan 27 rojî dewam kerde. 26ê êlule 2019 de şar semedê protestokerdişê ambargoyî heta nuqtaya kontrolî rayra şi. 28ê êlule de zî çalakîyêke ameye organîzekerdene la hêzanê Iraqî destûr nêda. Reyna şar he ca de vera amborgoyî tewir geno û nêrazîbîyayîşê xo ramojneno. Şarê Mexmûrî bitaybet zî Komîteya Karanê Teberî bi dezgehanê heqanê merdiman û sazgehê ke pabesteyê Neteweyê Yewbîyayeyî (NY)yê pêvînayîşî kerdî. Reyna bi selahîyetdaranê PDKyî yê ke muxatabê babete yê de pêvînayîşî ameyî kerdene.

Tewirê şar û rêxistinanê Kurdîstanî

Rîyê ambargoyî ra şarê Mexmûrî zaf tangayî ante. Hetkarîyê ke şarî rê ameyî kerdene zafî ray hetê PDKyî ra verê înan ame girewtene. Sere de şarê Kurdîstanî roşnvîr, hunermend, nuştox û partîyê sey HDP, KCD û PDYî semedê wedartişê amborgoyî veng da. La rixmê heme vengdayîşan ambargo yeno domnayene. Nê prosesî de NY û hukmatê Iraqî berpirsîyarîya xo nêarde ca. Vera hêrişanê Kampa Mexmûrî ya ke statuya ci ya sîyasî esto NY bêveng mend.

Rayîrê pêvînayîşan ameyî girewtene

Berpirsîyarê Karanê Teberî yê Kampe Bêwar Unverî ard ziwan ke înan seba ke sebenê ambargoyî bimusê û ey wedarê tay pêvînayîşî viraştî. Unverî vat: Badê amborgoyê peyêne PDKyî ma de tekîlîya xo birna. Rixmê heme astengîyan ma yew di dezgehan de pêvînayîşî kerdî û dima rê înan rê mektûbeke şawite la înan cewabê ma nêda. Dezgehanê Heqanê Merdiman bi raporêk bale ante serê caardişanê Mexmûrî ser û vat ke rîyê na babete ra 12 hezar kesî yenê cezakerdene û no xelet o.

Ambargo yêna manaya hemkarîya Tirkîya

Unverî vist vîrî ke sebebê amborgoyî hema zî sey fermî nêameyo eşerakerdene û vat: No ambargoyo ke 10 mengî yo dewam keno ramojnenêke bi Tirkîya hemkarîye esta. No ambargo xizmetê dewleta tirke keno. Ma reyna veng danê hukmatê Herêma Kurdîstanî ke wa xeletîya xo ya vera şarî qebûl bikerê na xeletîye ra peyser agerê. Na rewşe warê mîyanneteweyî de zî Hukmatê Herêma Kurdîstanî hurdî ramojnena. Ganî no ambargo cade bêro wedartene ke ê zî nê eybî ra bixelisîyê.