Welatê bindestî rê tîjêk gereke bîye. Tîjade cîya ye. Tîja ke heta a roje nêvejîyaybî. Tîja ke bişîkîyo ey tarî mîyan ra rakero. Tîja ke ey tarîyî roşt bikero. O tarî yo ke nêameyo vînetene. O tarî yo zulmatî ra zulmatêr. O tarî yo ke ci rê tarîf çîn bî. Ne edebîyatî, ne hunerî, ne zanistî, nêşkîyêne ey tarîf bikerê. Nameyêk bidêrê ci. Belkî şenik bo kî felsefe tayê pê bişîkîyênê a kî haya kesî ci ra çîne bîye. Dinyaya koran bî o tarî. Dinyaya kerr û lalan. Ê rew ra bîbî kerr û lal. Bibî kor.

Welatê bindestî rê germ lazim bî. Welato bindest zaf cemedîyaybî. Zaf cemedîyayênê. Serdode henên bî ke kewtênê mezgê astikan, mezgê astikan cemedîyênê. Germo ke qeşa mezg û zerrîya bihelêno. Koka înan zaf xorîn bîye la serê koka înan bi beton amaybî guretene. Ê hawt qat binê betonî de bî. Gereke tîje o beton biqilaşnênê ra. O betono hawt qatin biqilaşnênê ra û ê bin ra bivetênê. Ê gereke bivejîyênê. Ê xilaskarî bî. Ê xilaskarê ê bînan bî. Eke ê mebê ê bînî kî çîn bibê. Aye ra kî ferz bî xelasîya înan.

A tîje cayêde qedîm de vejîye. Cayêde bimbarekî de. Cayê wareyê peyxamberan, cayê cinîyan, cayo ke cinî bibî îlehî. Cayê genimî, cayê qutî. O cayo ke mordemîyê rê bibî dergûşe. Dergûşa xo de mordemîye lawnaybî, kerdbî girs. Cayêde vîranraşîyayî de. Cayo ke lanet û bimbarek kewtbî têvirare. Têvirare de bîyênê pîl. Her çî bibî dej. Dejî xo kilamanê ey de, werê ey de, awa ey de, deşt û koyanê ey de, gelî û gêrisanê ey de xo dayênê teber. A tîje uca ra vejîye û pêroyê welatê qemerî kerd roştî. Nika dinyaya ma kena roştî...