Qezaya Edene Karataş, herêma Tuzla- Tabaklar de çadirî ameyê rafîstene û nê çadiran de zêderîyê xo Surîyeyij û Kurdî manenê û na rewşe şert û mercanê kedkar û xebatkaran musnena. Tîya de 4 serrî yo ke çop nêdîyeno arê û weşîya domanan binê tehdîtê giranî de ya. Problemê awe û elektrîkî ra dima, bi varişê şilîye rewşe her ke şona bena girane. Ceyhan ra heta Karataş- Tuzla û Yumurtalik, arazîyê zîretî de xeylê çadirî estê û rewşa pêroyînan wina ya.

Keyeyê Demîrî welatê xo Şirnex ra şert û mercanê giranan ver, 9 serrî naye ra ver bar kerdo ameyê Tuzla-Tabaklar û 9 serrî yo nê çadiran de ciwîyenê. Keyeyê Demîrî ANFyî rê qisey kerd.

‘NO ERDÊ MA NÎYO’

Besra Demîr a 38 serrîye welatê xo de zîret û heywankarîye kerda û vana seba ke şert û mercî nêmendî ma mecburî bar kerd û ameyî tîya. Demîre wina qisey kerd: “Tedayanê sîyasîyan ver ma bar kerd û ameyî tîya. Ma rê ne erazîyo zîret verda ne zî merayo ke ma heywananê xo tede biçiraynîme verda. Ma zî seba ke pîzeyê domananê xo mird bikîme bar kerd. Seba weşîya domanan çi kar bibo ma kenîme. Tîya de eqreba û cîranê ma bîyî û ma zî ameyîme înan het. La ne erd ê ma yo ne zî no welat, no zî ma rê zor yeno.”

‘PERE QET ÇÎYÊK RÊ QÎM NÊKENO’

Demîre wina dewam kerd: “Ez maya 3 domanan a. Tîya de zimistan zor o yan hamnan, ma zaf fam nêkerd. Zimistanî çamur û şîlîye kewena çadiranê ma. Îmkanê germbîyayîşê ma çin o la hamnanî zî german ver ma bêzar benîme. Tîya de sey her kesî ma zî şonîme bax û baxçeyan de xebetînîme. Nika wextê îsotan o û ma îsot danîme arê. La pereyo ke keweno ma dest qet yew îhtîyacîya ma rê qîm nêkeno. Yew aşme de 1000 TL mesrefê ma yê erzaqî esto.”

Demîre va “Nê şert û mercan ver keyeyê min ê Şirnexî zaf keweno mi vîrî” û wina dewam kerd: “Nika ne keyeyê mi mendo ne zî çîyêko bîn, pêro ameyî rijnayene û vêşnayene. Tîya de mendişê ma rê ne şarê tîyayî ne zî şaredarîye razî ya. Çopî benê zêde la nênê nêdanê arê. Awa ma zî çinî bîye la weçinîyayîş de dî ke hûmara ma bîya zêde, ameyî û awe ante.”

‘NÊWEŞXANEYO TEWR NÊZDÎ 1 SAET Û NÊM DÛRÎ YO’

“Nêweşxaneyo tewr nêzdî yew saet û nêm dûrî yo. Problemê resî zî zaf zehmet o. Tîya ra wesayît roje de 3 dolimî şono Edene. Nêweş ke bibo ma nêeşkenê xo biresnê nêweşxane. Ez wazena ke yew keyeyo ke ma tede bimanîme bibo. Tîya de çiyo baş o yo ke pêro merdimê ma yê û eke çîyêk bibo resenîme yewbînî. Ma tîya de goreyê kulturê xo ciwîyenîme. Heywanê ma estê, ma penîr û ronê xo bi destanê xo virazenîme û nanê xo sacî û tendure de pewjenîme.”