Çemê Dîcleyî roje bi roje tayê bîn herimîyeno. Bi taybetî hamnanî rîyê boya gemare û çopanê ke qeraxê çemî de erzînê pêser ra dîmenêko xirabin vejîyeno mîyan. Vera na gemare zî qe tedbîr nêno girewtene.

Tena awe û gemara kanalîzasyonî ney, eştîyê ocaxanê xîzî yê ke serê çemî de zî zerar danê ci. Çemê Dîcleyî de verê zaf tewirê maseyan bîyî, la nika êdî  zafê ci nêmendê. Şar gemarekerdişê Çemê Dîcleyî ra nerehet o û wazeno ke qeraxê çemî ra çop  bêro wedaritene.

WAŞTIŞNAMEYAN RÊ CEWAB NÊNO DAYENE

Hemwelatijê bi nameyê Abdulhamît Çanci yê Cizîrijî ard ziwan ke, gemare nê serranê peyênan de zêde bîya û vat, ne şaredarîye ne zî Mudirîya Bajarî ya cugehî na babete de xebatêk kenê. Çanciyî vat, “Qiraxê Çemê Dîcleyî wareyê cimatkî yê merdiman o. Merdimî seba pîknîkî zî seba roniştişî zî yenê nê cayan. Awa kanalîzasyonan xozaye  herimnena. Ganî tarîxê Çemê Dîcleyî bifikirîyê û na babete de çi hewce keno bi leze bikerê. Ma zaf reyan waştişnameyî dayî selahîyetdaran, la xemê kesî nîyo. Seba pakkerdişê awa gemarine awguznayîş akerê. Her kes na boye ra aciz bîyo. Ma zî îdareyê newe yê şaredarîye ra wazenê ke çareserîyêk awa gemarine rê bivînê.”