Buroyê Koordînasyonê Hetkarîya Merdimî ya Neteweyanê Yewbîyayeyan (BCAH) da zanayene ke seba hetkarîya merdimî ya pêro dinya na serre  tewr tay 29 mîlyar dolar do hewce bibo.

Goreyê buroyî no vay seba merdimanê hewcedaranê ke mexdûrê şer û îklîmî yê do bêro xebitnayene. Na serre tewr tay 168 mîlyon merdimî do hewcedarê hetkarîya NYyî bibê ke nêmê înan Afrîkayîj ê.

Beyanat de ame vatene ke Yemen de çarî ra pancê nufusî û Sûrîye de zî 12 mîlyon kesî hewcedarê hetkarîya merdimî yê. Çolê Sahra de zî rewşe giran bîye. Ame vatene ke hûmara merdimanê ke nê herêman de hewcedarê hetkarîye yê tewr tay qasê 15 mîlyon kesan zêde bîye.

Beyanat de rewşa Somalî, Sûdanê Başûrî yê Komara Kongoyî ya Demokratîke zî ameyî ercnayene ke şerê zereyî nê herêman de zêde yo. Beyanatî de ame behskerdene ke bobelatê îklîmî semedo dîyin ê krîzê merdimîye yê ke mîsal Somalî de naye ra nêzdîyê 200 hezar merdimî warê xo ra bîyî. Yeno texmînkerdene ke Somalî de 6 mîlyon merdimî hewcedarê hetkarîya merdimî yê.

Komara Kongoyî ya Demokratîke de 16 mîlyon merdimî hewcedarê hetkarîye yê ke 5 mîlyonê înan welatê xo de rewşa multecîyan de yê. Kongo de têna ebola ra bi hezaran kesî merdî.

Beyanat de ame vatene  ke seba çareserîya nê krîzî ganî stratejîyêka averberde estba, nêbo na hûmara merdimanê ke hewcedarê hetkarîya merdimîye yê do biba zêde.