Dêrsim de hemwelatijan menganê payîzî de dest bi amadekarîya zimistanî kerde. Hemwelatijê dewa Kavaktepe ya pabesteya qezaya Mazgêrdî ya Dêrsimî dest bi viraştişê şerbetê engure kerd.

Dewijî  engura ke mîyanê rezanê xo ra arê danî  û dimayo ke di rojî danê arisnayene engure  kenî mehsere û eciqnenî. Awa engure ya  ke arê danî lênanê girdan de nizdîyê 10 saetan adiro gurî de girnenî. Badê gîrnayîşî, şerbet newe ra yeno parzunayene  û kupan de yeno cakerdene  û cayanê honikan de yeno wedartene.

Necla Şahîna ke  derheqê viraştişê şerbete de qisey kerd ard ziwan ke  tehmê şerbetî zaf weş o û semedê weşîye zî zaf hol o û vat herinda dermanî de yeno şimitene. Şahîne ard ziwan ke heme dewanê ke  rez tede esto şerbet yeno viraştene û  menganê zimistanî de verê her werî de yeno şimitene. Şahîne şerbetê engure yê Dêrsimî sey çîyê şimitişî yê tradîsyonkî name kerd û vat çîyê ke ma mayan û pîrikanê xo ra musayî ma rêça înan de tradîsyonê xo danê domnayene.