Almanya de ‘Kongreya Awankerdişî ya Dêrsimî’ ameye îlankerdene
Cimatê Newe ra Awankerdişê Dêrsimî yo ke 15 serrî verê cû Almanya de ameyo awankerdene, kongreya xo ya alelade ya 5’ine de nameyê xo bedilna û kerd ‘Kongreya Awankerdişî ya Dêrsimî’.
Kongre bajarokê Hochtaunusî yê bajarê Frankfurtî yê Almanya de, salona Merkezê Kulturî yê Elewîyan de ameye viraştene. Sere de Almanya, Belçîka, Fransa, Swîsre û Awusturya ra nêzdîyê 100 delegeyî beşdarê konge bîyî.
Seba Heyetê Dîwanê Kongre, ziwannas û nuştox Lerzan Jandil, Hemserekê Komela Vera Qirkerdişî ya Dêrsimî Turan Tekîn ve Songul Çelîke ameyî weçînayene. Parlamenterê Partîya Şaran a Demokratîke (HDP) yê Dêrsimî Alîcan Onlu û Parlamenterê Partîya Çepgir a Almanî Gokay Akbulate beşdarê kongre bîyî û qiseykerdişêk kerd.
Temsîlkar, hunermend û nuştoxê ke beşdarê Kongreya Awankerdişî ya Dêrsimî bîyî nê yê: Bi nameyê Merkezê Cigêrayîşan ê Dêrsimî (DAM) Huseyîn Ayrilmaz, Komela Vera Qirkerdişî ya Dêrsimî, Federasyonê Komelan ê Qoçgirî yê Ewropa, Hemsereka Federasyonê Elewîyan ê Demokratîkî (FEDA) Bedrana Yildirime, Însîyatîfê Depî yê Ewropa, Wezîfedaranê Perwerdeyî yê Unîversîteya Bremenî ra Çetîn Gurer, huqûqnas Nîhat Kaygalak û Nîhat Çelîk, nuştox û sîyasetmedar Demîr Çelîk, hunermend Ferhat Tunç, Ozan Comert, Mîkaîl Arslan, Cemîl Koçgirî, Ozan Serdar, Ozan Emekçî, nuştox Erdogan Yalgin, Erdal Er.
