Erdal Sezîşo (42) ke çîyan xirabeyanê keyeyanê ke 1990an de ameyî veyşnaye ra arê dano înan açarneno berhemanê hunerî. 2 serrî yo ke pêro pîya 100 dewan de geyrayo û ûca ra çîyî arê dayê.  

ÇÎYÊ KE DEWLETE VEYŞNAYÊ AÇARÎYENÊ BERHEMANÊ HUNERÎ

Sezîş bê ke şeklê înan ê xozayî xira bikero newe ra şekl dano înan. Na xebata Sezîşî Dêrsim de ya ewilên a. Amacê ê no yo ke bi nê berheman xusûsîyetanê tradîsyonel û kulturkîyan ê Dêrsimî bido naskerdene. Sezîş vano ke o wazeno nê berhemanê xo sey mîras biresno ameyoxî.   

AXURÎ AÇARNA ATOLYE

Serzîş bi îmkananê bisînoran na xebata xo rayîr ra beno. Ê sere de ê çîyan axur de arê dayî. Dima ra ê cayî zî açarna atolyeyêka xebate.  Sibayan şi dewan ke arê bido, saetanê ereyî yê şewe de înan açarnayî berhemê hunerî. Qismêkê ê berhemanê xo ra rotê zî.  

EZ WAZENA KULTURÊ DÊRSIMÎ BIDÎ NASKERDENE

Sezîşî dewamê qiseykerdişê xo de vat: „Huner zereyê merdiman de yo. Seva ke huner vejîyo meydan ganî kes cîyayîyan ferq bikero û ewnîyayoxêko rind bo. Heskerdişê min ê ahşabî qicîya mi ra yeno. Bi ahşabî ez wazena kulturê Dêrsimî bidî naskerdene.“

 ‘TARÎXO KE BI VEYŞNAYÎŞÊ DEWAN AMEYO TALANKERDENE’

Sezîşî ard ziwan ke kulturê înan vindîbîyayîşî dir rî bi rî mendo û vat: „Ez nizdê 100 dewan ra geyraya. Zafane berhemê ma yê kulturê ma danê naskerdene ez înan de nêvînena. Kulturê ma 1990an ra dima ame merheleya vindîbîyayîşî. Dimayê koçkerdişê mecbûrîyî ra eşyayê ê keyeyan ameyî talankerdene.“

‘XEYALÊ MI NÎNAN MUZE DE RAMOTIŞ O’

Sezîşî ard ziwan ke malzemeyanê xo de boyax nêşuxulneno, tenya ahşab de pawitoxî şuxulneno. Seva ke bereqîyaye biasê zî rûnê zeytûne şuxulneno. Sezîşî peynî de vat : “Tenya yew xeyalê mi esto o zî nê berhemanê xo rojêk muze de ramojnî. ”