Elewîyê Kakaî yê ke bajarê Silemanî yê Herêma Kurdistanî ya Federale de ciwîyenê seba ke sazgeh û temsîlkaranê Elewîyan de pêvînayîşan bikerê ameyî Dêrsim. Heyeto ke 15 kesan ra yeno pê vizêrî şan ame Dêrsim, hemserekanê Komela Elewîyan a Demokratîke (DAD) Selda Guneşe û Musa Kuluyî reyde Pîr û dayîkî vera înan  şîyî. Heyetî reyde derheqê bawerî Elewîyanê Dêrsimî de pêvînayîşî ameyî kerdene.

Heyeto ke do  hewteyêk Dêrsimî de bimano verê cû ame berdene bi Wareyê Seyîd Rizayî û heyetî rê qalê serebûtanê 1937-38’î û Seyîd Rizayî ame kerdene.

Elewîyanê Kakaîyan zî derheqê pêvînayîşê ke înan sazgehê û temsîlakaranê Elewîyan ke Tirkîya de yê kerdê de zanayîşî dayî. Elewîyanê Kakaîyan ard ziwan ke zîyaretkerdişê sazgehanê Elewîyan ê zaf kerdê keyfweş û kêmasîyêka gird a ke nê pêvînayîşî û yewbîyayîş heta ewro nêameyê kerdene. Elewîyanê Kakaîyan bale ante ser ke ê bi pêvînayîşan şîyî ser ke  hewcedarîyêka gird esta ke seba êyê ke bawerîya Elewîyî ya Reya Heqî dane yewbîyayîş lazim o û nê pêvînayîşî zî seba ciwîyayîşê bawerîyan gamêk a.

Heyetê bado zî şîyî serdena Ana Fatma û çilayî ameyî tafînatene, loqmeyî ameyî vilakerdene. Derheqê têsîr û giranîya Ana Fatma ya ke cinîyanê Elewîyan û şarî ser o esta de ame qiseykerdene. Reyna  zî şîyî serdana Gola Çetuyî.   Heyet hîrê rojî bînî do Dêrsim de bimano û Bava Munsur û  Ocaxa Axuçanî do zîyaret bikero.