Bajarê Silêmanîye yê Başûrê Kurdistanî de mabênê 6-8’ê Nîsane de Forûmê Awe yê Mezopotamya yo 1’in amebi viraştene. Encamnameyê forûmî ame eşkerakerdene.

150 çalakwanê awe û dostê înan Unîversîteya Silêmanîye de 3 rojî ameybî têver û serê problemê awe yê Mezopotamya de munaqeşeyî kerdîbî.

Forûm de xeylî atolyeyî zî ameyî viraştene.

Qerar ame dayene ke Forûmê Awe yê Mezopotamya yo 2’yin Amed de bêro viraştene.

Encamname

Encamnameyê forûmî de nê çîyî vejîyayî vernî:

“Ganî hemverê polîtîkayanê awe yê kolonyalîstan de bêro vindertene. Seba ke awê Dîcle û Firatî heme merdim û ganeyan dir bêrê parekerdene, paştî bidîyo peymannameyanê mîyanneteweyîyan.

Ganî hemverê hegemonyaya awe de vejîyê û destûr nêro dayene ke no çî sey sîlehêk bêro şuxulnayene. Mezopotamya de ewro dewletê ke cor de yê ganî heqê awe yê welatanê ke cêr de yê qebûl bikerê.

Ma veng danê Tirkîya û Îranî ke wa awa ke şina Sûrîye û Iraqî nêbirnê.

Seba vindarnayîşê viraştişê awbendê Ilisûyî ke do Hesenkeyfî bine awe de verdo û seba ke wareyê awîyî yê Başûrê Iraqî bêrê pawitene ma veng danê. Ganî bêro zanayene ke awe heqê her kesî ya.

Yew sebebê leyminbîyayîşê Royê Dîcle o yo ke heta Bismil statuya royî de nêno hesibnayene. Ganî hetê corî yê royê Dicle ancî bikewo statuya royî.

Kampanyaya ciwînayîşê Dîcle eşkena bi paştdayîşê torê çalakwananê awan bêro xurtkerdene û bi rapor û eşkerayîyanê hemparan hal rayapêroyîye rê bêro pêşkêşkerdene.

Amac no yo ke Forûmê Awe yê Mezopotamya yo 2’yin Amed de bêro viraştene.”