Hamburg de kurdan û aktîvîstanê heqanê merdiman vera tehdîtê tebersînorkerdişê Mehmet Çakasî çalakîya protestoyî organîze kerde. Çalakîyî Hannover, Celle û Uelzen de do dewam bikerê.

Bajarê Hamburgî yê Almanya de semedê aktîvîstê kurdî Mehmet Çakasî yo ke bi tehlîkeyê tebersînorkerdişî rî bir î yo, çalakîya protestokerdişî ameye organîzekerdene. Dîya zanayene ke Saksonyaya Cêrîne û dormeyê ci de do çalakîyî dewam bikerî.

Çalakîyan ke roja îneyî Hannover de dest pêkerd ewro Hamburg de dewam kerd. Xeylê aktîvîstî ameyî têhet û vera tebersînorkerdişê Mehmet Çakasî yê çewligîjî nêrazîbîyayîş mojna ra.

Çalakîye de pankartê sey “Mehmet Çakasî rê azadîye” û “Semedê Mehmet Çakasî heqê mendişî” ameyî kiriştene. Eşkerayîye de ame vatene ke Tirkîya de rîskê giranî Mehmet Çakasî pawenê û ame waştene ke wa qerarê tebersînorkerdişî bêro vindarnayene û proseso edîl yê îltîca bêro rayraberdene.

Qiseykerdişan de ame waştene ke wa krîmînalîzkerdişê  têgêrayîşê azadîye yê kurdan bêro vindarnayene û ame vatene ke no têna vera şexsêkî nîyo, meseleyêka polîtîk a.

Çalakîye semedê tewrbîyayîşê çalakîyanê ke do rojanê verê ma de Hannover, Celle û Uelzen de bêrê kerdene,ame vengdayene.