Hemserekanê Pêroyî yê DEM Partî Tulaye Hatimogullari û Tuncer Bakirhanî derheqê rewşa weşîya Sirri Sureyya Onderî de verê nêweşxaneyî de eşkerayîye daye.

Bakirhanî xebatkaranê çapemenîye, kesanê ke telefon kerd û semedê zîyaretî ameyî înan rê spas kerd û nê vatî:

''Ez reyna Birêz Serekkomar, Birêz Serekê Meclîs, serekanê partîyanê sîyasîyan, rêxistinanê komelê sîvîlî, rêxistinanê gireyê demokratîkî, heme renganê Tirkîya rê spas kena. Roja verêne ra hema tîya veng nêbîyo. Heme şar û bawerîyê Tirkîya semedê paştdayîşê Onderî ameyî tîya. Ez înan rê zî spas kena.

Ma pêro pîya rewşe teqîp kenê. Xora îdareyê nêweşxaneyî û hekîmanê ke no operasyon kerd zanayîş danê şarî. Ez nêwazena vatişanê înan ra ser çîyêk vajî. Ma zî eşkerayîyanê nêweşxaneyî esas genê. Eşkerayîye înan esas ê.  Wa ne şarê ma ne zî çapemenîye goş bido şîroveyanê cîyayan û spekulasyonan.

Sirri Sureyya Onder kesêk o xoverdayox o. Ê bi serran têkoşînê haştîye û demokrasîyî da, xeylê demê zehemtî xo dima verdayî. Ez pê bawer a ke nê zî xo dima biverdo. Sirri Sureyya Onderê ke bi serran têkoşîn kerd û bedel da do reyna şarê ma û têkoşînê xo reyde bêro têhet.

Têkoşîn keno, xover dano. Ma hêvî kenê ke no têkoşîn û xoverdayîşê ey ser kewno, o  beno weş û ma resenê pê. Nê rojê tarîxî yê, şima zî seyr kerd. Şarê Tirkîya pêro pîya de bê. Raşta rewşa ey meraq kerde la tewr zaf semedê têkoşînê ci yê haştîye û demokrasîyî paştî dîayaye ci. Ez hêvî kena ke no paştdayîş û wayîrvejîyayîş rojanê verê ma de bi wayîrvejîyayîşê têkoşînê haştîye yo ke Sirri Sureyya Onderî semedê ci weşîya xo zî daye,dewam bikero.

Ez bi hewayêkê kilmî zanayîş bidê. Ez nêwazena bikewe meseleyanê tibîyan la lwazenê nê vajî. Hekîman vat her roje dahîna aver şino. Paştîya ma zî înan ra pêt a. Wa teredutê çewî çînêbo. Ma nêweşxaneyê tewr holan ê Tirkîya ra yewî d eyê. Hetê hekîmanê tewr holan ra operasyon ame kerdene. Ma hêvî kenê Sirri Sureyya Onder şertanê holan de bi hekîmanê holan bibo weş.''