Koordînasyonê KJKyî bi wesîleya serrgêra 20ine ya ronîyayîşê xo eşkerayîyêke daye. Eşkerayîye wina ya:

‘’Ma hê serrgêra vistîne ya ronîyayîşê xo de yê. Serrgêra ronîyayîşê ma sere de Rayber Apoyî rê, pêro cinîyan rê fîraz biba. Ma pêro şehîdanê xo zî bi minet û heskerdişî yad kenê ke 18ê nîsana 2005î ra nata refanê KJKyî de kede dabî. Ma soz danê şehîdanê xo ke cuya azade bi şorişê cinîyan tacîdar bikerê.

Rayber Apoyî tim têkoşînê cinîyan kerd kerdoxê Şorişê Kurdîstanî. Rayber Apoyî şorişê Kurdîstanî sey şorişê cinîyan pênase kerd û jineolojî, artêşa cinîyan, teorîya cîyabîyayîşî, îdeolojîya azadîya cinîyan zî kerdî motîfe ci. KJKyî vera serdestîya camêrdan têkoşînê azadîya cinîyan kirişt safhayêka bîne. Rayber Apoyî sîstemê konfederalî de seba komelê demokratîkî têkoşînê cinîyan vist vernî.

Serkêşîya cinîyan de înşaya komelê demokratîkî newe ra yena gandarkerdene ke nê erdî de hetê sîstemê serdestîya camêrdan de amebî çinkerdene. Coka Ronesansê Cinîyan tena bi yew cînsîyetî sînordar nîyo, cewherê xo de yeno manaya azadkerdişê cuya komelkîye. Têkoşînê Cinîyan ê Kurdîstanî bi konfederalîzmî sîstemê xo yê rêxistinîye newe ra awan keno. Vilabîyayîşê formulê Jin, Jiyan, Azadî zî îsbatê tesîrê nê dîyalektîkî yo.

Rayber Apo seserra 21ine sey seserra cinîyan pênase keno. Rixmê pêro hêrişanê sîstemê serdestîya camêrdan zî vildayîşî mijdanîya wisarê cinîyan danê. La seba caardişê şorişê cinîyan ganî ma hîna zaf xo rêxistin bikerê. Sere de Kurdîstan de Rojhelatê Mîyanênî û dinya de pîlkerdişê têkoşînê azadîya cinîyan şert o. Ma do bi awankerdişê komelê demokratîkî û bi caardişê nasnameyê cinîyan ê azadan serdestîya modernîteya kapîtalîste bin bivisnê. Ma venga pêro cinîyan danê ke sîstemê konfederalê demokratîkî de yew bibê û peymana komelkîbîyayîşê cinîyan bîyarê ca. Ma bingeyê têkilîyanê demokratîkan û îtîfaqan de torra xo hîra bikerê, rengîn bikerê û bihêz bikerê!

Ma sîstemê xo yê alternatîfî awan bikerê û tede vera kulturê şîdet û koletîye cewabê ‘cuyêka senîne?’ bidê. Manaya konfederalîzmê cinîyan na ya; cuya ke ma hesreta ci yê, bi destanê xo awan bikerê. No hetê bînî ra cewherê sosyalîzmî yo ke Rayber Apoyî rixmê tecrîd û îşkenceyî newe ra vist ser. Coka armancê têkoşînê ma yo verên  înşaya sîstemê têkilîyanê komelkîyan ê têdûştan û azadan o.

Ma bi coş û kelecanê Vengdayîşê Haştîye û Komelê Demokratîkî yê Rayber Apoyî serrgêra vistîne ya ronayîşê xo pêşwazî kenê. No vengdayîşo ke sey manîfestoyê seserrî pênase beno, cewherê têkoşînê cinîyan zî yo. Înşaya cuya komunalîste ya vera kulturê şîdetê sîstemê camêrdan bi têkoşînê serkêşîya cinîyan mumkîn o. Coka ma sere de cinîyanê Kurdîstanî venga pêro cinîyanê Rojhelatê Mîyanênî û dinya danê ke wayîrê vengdayîşê Rayberîye vejîyê, tewrê Hemleya Azadîye bê û têkoşînê hemparî pîlêr bikerê. Têkoşînê cinîyan o hempar do sîstemê tecrîd û îşkenceyî yê Îmraliyî birijno!

Nê rojan de ke ma wisarêkê neweyî de yê wextê ci ameyo ke ma erdê Şorişê Cinîyan ê Yewinî de vilan abikerê. Ma serrgêra vistîne bi îdîaya wisarbîyayîşê cinîyan fîraz kenê. Ma xeyalê vilkerdişê Kurdîstanî yê xeyalê embaze Sara-Sakîne Cansiz ser o venga pêro cinîyan danê ke ewro vilan û leyanê daran ronê. Bi Jin, Jiyan, Azadî ma ver bi Şorişê Cinîyan şorê, bi na wesîle seserra 21ine bikerê seserra azadîya cinîyan, sîstemê konfederalê demokratîkî înşa bikerê û Ronesanê Cinîyan bîyarê ca.’’