Bi nameyê Huseyîn Îsotî de keso ke dewa Azikanî ya Semsûrî de cuyeno, karê heywankarî û zîratî reyde mijûl beno. Îsotî mîyanê axurê xo de kuncikêk kerdo atolye û 20 serrî yo ke ewja de tembûran virazeno. Îsot demanê peyênan de tuyêrî ra tembûran virazeno û nê tembûrî eleqeyêko gird vînenî. Îsot tembûranê xo roşeno dikananê muzîkî, labelê krîzê ekonomîke ver o zî no het de zehmetîyan anceno.

Îsotî va ‘seba me mi nê karî ra zaf heskerdêne û meraq kerdêne, mi dest pêkerd’ û wina domna: “Zerrîya mi de eşqê tembûrî estbi. O wext îmkanê mi yê herînayîşê tembûrî çinêbî. Mi bi xo dest pêkerd û 20 serrî yo ke ez nê karî kena. Ez malzemeyanê tembûran Meletî, Îzmîr û Dîlok ra peyda kena. Tembûr yena manaya heskerdiş û kede. Eke şima kede bibî, çîyêk destê şima ra nêxelisîyeno.”

Îsotî va ‘ma tîya de seba ke kulturê ma çin nêbo, hewl danî’ û wina dewam kerd: “Ma elewî yî û tembûr seba ma zaf muhîm o. Ma wazenî ke wa domanê ma zî bimusî. Ma seba ci têkoşîn danî. Vengê tembûrê tuyêran, hertim hîna weş o. Aşiq Veysel zî tembûrê winasî bikar ardêne.”

Îsotî peynîye de bale ant krîzê ekonomîke ser û wina va: “Ma goreyê sîparîşî virazenî. Krîzê ekonomîke ma ser o zî tesîr kerd. Ma nika nêşenî tembûranê xo biroşî. Viraştişê tembûrêk qasê 15 rojan dewam keno. Seba ke tembûrê ke fabrîkayan de virazîyayî hîna erjan î, ê hîna zaf roşîyenî. Labelê tembûrê ma hîna bikalîte yî.”