Dewê ke koçberîye dîye, vêşîyayî her serrewext pê dewijanê xo şa benê. Înan ra yew zî dewa Onexî ya qezaya Tetwanî ya Bedlîsî ya. 

Dewijê ke wisar de firingî, îsot, xiyar ûsn ramenê nika berhemanê xo ra îstîfade kenê. Dewijî paştîya xo nanê nê gozêranê tarîxîyan. Her yew goze wayîra name û tewir a. Bi giranî gozî goreyê çetinîya xo nameyan gênê.

Dewijan ra Şukrane Erbaşa 65 serre vana: ''Ez bîya veyveya na dewe. Dewa ma de zî ma nameyan danê gozêran. Nameyê na dare zî Nazê ya. Darêka nazdar a coka.''

Dewijî nêeşkenê vejê serê gozêranê girdan ser. Dewijî venga karkeran yan zî dewijanê Xîzanî danê ke hostayê nê karî yê. Êyê ke nê karî kenê her serre qezayêk yeno înan ser; daran ra ginenê erdî ro, dest û lingê înan şikîyenê.

Ahmet Bayirî de nobetdarê gozêran o. Ahmet vano: ''Domanîya xo de zî ma no kar kerdêne. Ma roje de 300 TL qezenç kenê la no kar her tim çin o. Xora karêko bitehluke yo. Ez qet dare ra nêginaya labelê tay embazê mi ginayî. Teşrîna verên û peyêne de gozî benê rindî û arê dîyenê. Zimistanan ma karê bînî kenê.''

Arêdayîşê gozan na dewe de karêko komunal o. Dewijî her roje binê gozêrêke de kom benê û gozan danê yewbînan.