Komela Kulturî û Paştîdayîşê Sosyalî ya Gêxî, Dep, Azarpêrt, Xorxol û Çêrme (KAYY-DER) Umranîye de şewa paştîdayîşî organîze kerde.

Mîyanê kesanê ke tewrê şewe bîyî de parlamenterê HDPyî Hîşyar Ozsoy, Erdal Aydemîr û endama Meclîsê Partî ya HDPyî Asîye Kolçake û pîyê Helîn Palandokene Nîhat Palandoken zî estbî.

Dimayê dekewtişêkê kilmî ra fîlmêk ke tarîx û aktîvîteyanê komele qal kerdêne ame ramotene.

Koma Dengê Biratî ra Alîcan Bîlgînî kilamê kurdkî vatî. Grûba kayê şarî ya KAYY-DERî û Koma Dîlane zî dansê şarî pêşkêş kerdî.

Parlamenteranê HDPyî ra Erdal Aydemîrî yo ke tewrê şewe bibi qiseykerdişê xo de ard vîrî ke parlamenterê Çewlîgî yo verên Îdrîs Baluken tepişte yo û vat “mi şima rê silamê Îdrîs Balukenî ardî.”

Parlamenterê HDPyî yê Amedî Hîşyar Ozsoyî zî roja mucadeleyê şidetê hemverê cinîyan ser o vindert û vat: “Bi wesîleya na roje ez parlamentera Colemêrgî Leyla Guvena ke nika grevê vêşanîye de ya ana vîrî. Nê welatî de eke Yezîdî estê Huseynî zî estê.”

Dima ra muzîsyene Pinar Aydinlare kilamê tirkî û kurdkî vatî. Şewe de tewr peynî muzîsyen Eray Topçuyî sehne de cayê xo girewt.