Komîteya Şar û Bawerîyan a KCK’yî bi wesîleya rojeyê Remezanî eşkerayîyêka nûştekîye daye û vat, “Şaro Kurd mîyanê hêrişan de dest bi Remezanî keno. Hemverê nê zulm û înkarî de bi hezaran ewladê Kurdan bi mengan o grevê vêşanîye de xover danê. Hewteyêk o pancês ciwanê Kurdî rojeyê mergî de yê. Mayê Kurdî yê ke vengê wijdan û exlaqî yê, ke emrê heme dînan o, pîya bi domananê xo xover danê.

Dînê Îslamî de kerdişê ke dereceya rojeyî de yenê kerdene, xêrê înan pîl o. Dewleta Tirkî bi Erdoganî Îslamî şuxulnena, rastîya şarê ma înkar kena û hêriş kena. Hemverê nê zext û heqaretanê dewleta Tirkî de ma veng danê şarê Kurdî ke Remezan de mucadeleyê hemverê dewleta Tirkî ya zalime hîna bikerê xurt. Seba Kurdistanijanê ke pawitişê irz û namûsî wezîfeyê înan o, îbadet bi xoverdayîşî beno, naye ra xêrê ci zî hîna pîl o. Çunke seba Muslumanêk ke hemverê ci de hêrişê înkar û çinkerdişî yenê kerdene, xoverdayîş îbadet o.”

Fitre û Zekatê ke Dîyenê Sazîyanê Dewleta Tirkî Benê Bomba û Agêrenê Şarê Kurdî Ser

KCK’yî dewamê eşkerayîya xo de nê vatî: “Eke şima fitre û zekatanê xo bidê sazîyanê dewleta Tirkî ê do bibê fîşek, gaz, sîleh û bomba û agêrê şarê Kurdî ser. Bi wesîleya Remezanî ma veng danê şarê xo yê Vakurî û yê ke tebere welatî de yê wa nêşirê camîyanê dîyanetê Tirkan. Camîyanê dîyanetê Tirkan de teberê înkar, zûre, fitne, îftîra, fesadî, vengdayîşê seba qirkerdişan û dirîtîya hemverê şarê Kurdî çîyêna çino.

Şarê Başûrî Ganî bi Ruhê Şêladizê Dest bi Remezanî Bikero

Ma nê bawerîye de yê ke şarê ma do nê Remezanî de sohbetanê xo, vengdayîş û xutbeyanê xo derheqê hişmendî û hîsanê yewîya neteweyî ya demokratîke de bikero. Dewleta Tirkî dişmenê Kurdan a. Her parçeyê Kurdistanî de hêrişê şarê ma kena.

Ma veng danê şarê xo ke nê Remezanî bikerê wesîleya xurtkerdişê yewîya xo, wereyameyîşê merdimanê ke yewbînan ra heredîyayê û xurtkerdişê paştdayîşî. Ma veng danê ke fitre û zekatanê emserî sazîyanê welatperweran rê bêrê dayene. Bawerîya ma bi ê sazîyan esta ke ê do zî înan biresnê afetzedeyanê Rojhilatê Kurdistanî û Kurdistanijanê ke îhtîyacîya înan bi hetkarîye esta. Sere de seba Muslumananê Kurdistanijan, ma umîd kenê ke seba heme Muslumananê demokratîkan Remezan bibo wesîleyê xêrî, roje, dua û nîyetê înan qebûl bibê.”