Qezaya Gazîemîrî yê Îzmîrî de vera keyeyêkê elewîyan hêrişêko nîjadperest ame kerdene. Keyeyê Şenalî yo ke taxa Yeşîlî yê Gazîemîrî de ronişeno ser o ''bitewezîye elewî'' ame nuştene û keye ame îşaretkerdene.  Polîsan hêrişî ra dima serebût sey karê serxoşan yan zî ê domanan îfade kerd. Keyeyê Şenalîyî zî pare kerd ke hêriş hetê domanan ra nêame kerdene û biqesawet ê.

 Gore xebera rojnamegera Birgunî ya Aycane Karacadag  babî Bayram Şenalî derheqê hêrişî de tay beyanatî dayî û vat: "Polîsan ma ra va karê domanan o. Rayîr û awa ma çin ê. Ma seba naye şîbî şaredarîye. Hetkarê şaredarî ma ra va ke 'Şima rê awe û rayîr nêdana' û wezîfedaranê asayîşî hêrişê ma kerd û ma derb kerdî. Dima ke ma şarederîye reyde muneqeşa kerd no hêriş qewimîya. Ma înan ra şik kenê la ma nêeşkenê rast a rast vajê înan kerd."

Lajê keyeyî Eren Şenalî zî va: "Mi babîyê xo rê va ke venga polîsan bido. Keyeyo ke ser o nuşte ame nuştene de 4 kesî ciwîyenê. Polîsan bi sipreyanê sûran serê nuşteyî girewt. Naye ra verî tîya de çîyêko winasên nêqewimîya. No hêriş hêrişêko gemarin o." 

Şaredarîye ra Beyanat 

 Şaredarîya Gazîemîrî zî derheqê hêrişî de beyanatêk da û vat: ''Çarçewa nê hêrişî de hetkarê şaredarê ma yeno sucdarkerdene û îftîra erzenê ey. Ma xemgîn ê ke nê îdîayanê ke medyaya komelkî ser o vila benê ser o beyanat danê."