Hêrişê dewleta tirke yê vera Rojawanî perwerde ser o tesîrêko pîl kerd. Bi taybetî herêmanê sînorî de dezgehê perwerdeyî binê pêro zehmetîyan de zî xîret kenê ke perwerde dewam biko û dibistanî zî amadekarîya xo kenê ke wendekaran dest pê perwerdeyî bikê.

Zimistan û taxrîbatê ke dibistanan de ameyî meydan perwerde ser o tesîrêkê tewr pîlî yê. Tay dibistanî seba ke xebatî nênê kerdene dibistananê bêpencera û bêberan de do dest pê perwerdeyî bikê.

Endamê Îdareyê Dibistanan ê Herêma Firatî Xalîd Ceradêyî ard ziwan ke îşxal de tewr zaf dibistanan zerar dî, tay dibistanî ameyî bombavarnayene û tay dibistanî zî hetê dewleta tirke û cerganê aye ra sey qerargehan yenê xebitnayene.Kobanê de dewa Xerab Xelî de domanî dibistanêka bêber û bêpencera de perwerde vînenê. Tay dewanê Kobanê de dibistane zî çin a ke dewa Qerarîşkî ya Kobanê zî înan ra yew a. Dewije Zehra Celal vat ke dewa înan de dibistanêke çin a û domanî neçare manenê ke şorê dibistana dewa Îtoyaranî.

Rojawan de termînê perwerdeyî yê 2019-2020î 15ê êlule de dest pêkerdibi la bi îşxalê dewleta tirke yê 9ê teşrîna verêne falîyetê perwerde vindertî.Kobanê de rîya hêrişan ra perwerde qasê 25 rojan ame vindartene. Kanton de 42 bînayê perwerdeyî seba sivîlanê ke hêrişan ra remayî sey cayê mendişî ameyî peydakerdene. Dibistananê sînorî de zî semedê asayîşî ra perwerde nêno dayene. Îşxalê dewleta tirke yê vera Rojawanî ra verî Kantonê Kobanê de 56 hezar 800 wendekaran perwerde dîyêne û 26 hezar 28 mamostayan wezîfe kerdêne.

Hêrişanê dewleta tirke ya îşxalkere de Girê Sipî de mamostayê bi nameyê Mihemed Dirêyî û Rabîa Îsmaîl şehîd kewtibî.