40 koçberî seba biresê Ewropaya Rojawanî Lîbya ra kewtîbî rayîr û dima ra Deryaya Sipî de asê mendîbî, roja Çarşemeyî bi keştîya ‘Alan Kurdî’ ke Deryaya Sipî de gure kerdêne û ya organîzasyonê hetkarîye yê bi nameyê Sea-Eye’yî, ameyî xelesnayene. La tu welatî koçberê ke Nîjerya, Qeraxanê Didanê Fîlî, Gana, Kongo û Kamerûn ra kewtîbî rayîr û mîyanê înan de di cinîyê diganî, pitikêk û 2 domanê qijkekî estbî qebul nêkerdîbî.

 Dimayo ke sazîya hetkarîye îlan kerd ê ver bi girawa Lampedûsa ya Îtalya kewenê rayîr, wezîro rastgêr o radîkal ê Îtalya Matteo Salvînîyî vatibi ke bi tu hawayî ê do destûr nêdê ke keştî sînoranê înan ra ravêro. Şewa bîne serekwezîrê Malta Joseph Muscatî vat, înan qerar dayo ke do koçberî welatanê Yewîya Ewropa rê bêrê vilakerdene û naye ser înan qerar dayo ke keştî bikewo sînoranê înan mîyan. Serekwezîrî serê hesabê xo yê medyaya sosyale ra eşkerayî daye û vat, “hukmatê Almanî û Komîsyonê Ewropa sond wend ke koçberî do welatanê endaman ê YE rê bêrê vilakerdene, tu koçber do Malta de memano.” Dimayê eşkerayîya serekwezîrê Malta ‘Alan Kurdî’ ver bi Malta kewte rayîr, yeno pawitene ke no serê sibayî hêzê deryayî yê Malta koçberan bigêrê. Dimayo ke serê na Temmuze de 50 ra vêşêr koçberî merdî, ‘Alan Kurdî’ ancî qeraxanê Lîbya de dest bi wezîfeyî kerdibi. Sazîya hetkarîye ya bi nameyê Sea-Eye nameyê keştîya xo ya hetkarîye ke Deryaya Sipî de gure kerdêne, kerdibi ‘Alan Kurdî’. Êlula 2015’î de bedenê domanê qijkekî yê Rojawanê Kurdistanijî Alan Kurdîyî, ke ver bi Ewropa kewtîbî rayîr, qeraxê Bodrûmî de amebi dîyene.