Komela Dêrsimî ya Enqere ya ke  bûrs dana wendekaranê feqîran ê zanîngehe,  hetê bînî ra Riha, Amed, Şirnex û Dêrsim de zî bi kampanya hetkarîya wendekaranê dibistane kena.

“MA ŞARÊ BINDESTÎ, HETÊ  BINDESTAN DE YÊ”

Derya Donmeza ke îdareyê komîsyonê ciwanan ê Komele de ca gêna, derheqê kampanyaye de nê vatî: “Ma wazenime ke biresîme her kesî. Derdê ma tena Dêrsimijî nîyê, çunke huyayîşê pêroyê domanan sey yewbînî yo û seba ma muhîm o. “Ma par bi bûrs dest bi nê karî kerd. Komela ma bûrs dana 15 wendekaran. Reyna xeylê dibistananê dewan rê hetkarîya malzemeyê kirtasîye û kitaban organîze kenîme. 2 mengî naye ra ver Riha ra yew mamosta resa ma û ma ra seba kitaban hetkarîye waşte. Ma zî naye ser kampanya daye destpêkerdene û bi na kampanya wazenîme ke biresîme her kesî. Ma Dêrsimijî bindestîye baş zanime û wazenîme ke feqîr û bindestan rê hetkar bibîme.”

Qaso ke Donmeze vana, keye bi keye gêrayê û kitabî aredayê. Donmeze vana “çi ke keweno ma dest ma erşawenîme dibistananê dewan.Naye ser a Mamosta, domanî û wendekarî bi zerrîweşîya xo ma rê vîdeoyan erşawenê û no zî ma keno zerrîweş û şad.”

Donmeze vana ma wazenîme ke hîna zêde çiyan bikîme la çîyo ke no dem ma dest ra yeno no yo. Qaso ke Donmeze vana Amed ra yew dibistana ke rewşa xo xiraba ci ra hetkarîye waşta. 

Goreyê beyanatê Donmeze di serrî yo ke burs danê û serra verî 12, emser zî 15 kesî komele ra burs gênê. Donmeze no derheq de wina qisey kerd: “ îmkanê ma zî zaf başî nîyê la ma wazenîme ke hîna zêde hetkarîye bidîme wendekaran.Seba naye zî xebatanê xo domnenîme û kenîme ke pêroyê domanan û wendekaran rê bibîme hetkar.“