Koordînasyonî eşkerayîye de şewato ke Yewşeme Hesenkeyf de dest pêkerdibi vist vîrî û vat, “Yewşemeyê ravêrteyî de corê dêzî de bi sebebêk ke hewna nêno zanayene şewatî dest pêkerd û heta ereyîya şewe xo ver ra tefîya. Şewato ke nizdê hîrê saetan dewam kerd, bîyo zirarêko bîn ke ginayo Hesenkeyfî ro.”

 Eşkerayîye de ame vatene şewato ke nêno zanayene tirêm kamca ra û senî dest pêkerdo zirar dayo awanîyanê tarîxîyan, şikeftan û eseranê tarîxîyan ro û fînîya vîrî ke tena wesayîtêkê îtfaîye seba tefnayîşî ameyo, ganî hewayî ra zî îstîfade biameyêne kerdene ke şewat bêro tefênayene la nê hetî ra zî  çîyêk nêameyo kerdene.

 ‘Ûca Wareyêk o ke Tena Fîrma û Dewlete Eşkena Şiro…’

Koordînasyonî heman wextî de ard ziwan ke şewat hetê selahîyetdaranê dewlete û fîrma ra ameyo vetene û vat, “Şarê Hesenkeyfî vano, rew ra yo ke corê dêzî de şewatêko winayên nêbîyo, şîyayîşê ûcayî qedexe yo û tena karkerê ke fîrma de xebetênê û selahîyetdarê fermîyî eşkenê şirê ûca.” Koordînasyonê Hesenkeyfî heman wextî de vat nêno zanayene ke tirêm çiqas ware vêşayo, çiqas zirar resayo eseranê tarîxî û kulturkîyan û vat ke derheqê nê qewimîyayîşî de cigêrayîş yan zî xebatêka fermîye hewna nêameya destpêkerdene.

Heta Peynî Mucadele

Koordînasyonî seba tespîtê zirarê şewatî waşt ke heyetêkê organîzasyonanê cimatê sivîlî bêro awankerdene û tavilî şiro wareyî. Tewr peynî de ame vatene ke sînayoxê tarîx, xoza, kultur û wareyê cuye do hemverê projeyê Awbendê Ilisûyî û HES’an de heta peynî mucadele bikerê.