Sungî wisar de varanî ra dima yan zî virsikî ra dima koyanê Kurdîstanî de zîl dana. Wisar de hem seba tamê ci yê weşî hem zî seba faydeyê ci yê seba weşîye hemwelatîyî verê xo danê wareyan û sungan  arê danê.

Hemwelatîyanê dewanê qezaya Balekayetî yê Hewlêrî zî seba arêdayîşê sungan verê xo da ware û koyanê herême. Hemwelatîyan ra Huner Kewertîyo ke seba arêdayîşê sungan verê xo da wareyanê Balekayetî vat sung wisar de werdo serek ê herême yo.  Hemwelatîyê bi nameyê Mihemed Selahî zî vat: ''Sungê Balekayetî zaf bitam û namdar o. Coka her serre şar seba arêdayîşê sungan kom beno û ver bi koyan û wareyan şino.'' Selahî da zanayene ke wexto ke ê sungan arê danê adirî ser o pewjenê, keye de zî qilnenê û werdanê sey birincî û savarî reyde wenê. Selahî  vat tay hemwelatîyî zî sungan arê danê û bazar de roşenê.