Goreyê xebera rojnameyê Ozgur Polîtîka eyaletê NRWyî yê Almanya de hendî dibistanan de do kurdkî sey dersa weçînitî bêro mûsnayene. Wendekarî do sinifa 5. û 6. ra tepîya sey ziwano xerîb o dîyin do bieşkê kurdkî biweçînê. Notê dersa kurdkî do tewrê notanê pêroyîyan ê dersan bêro kerdene.    

Cehdê di serrî yê Yewîya Malimanê Kurdistanî (YMK) netîce da. Serekê YMKyî Abdulkadîr Ulumaskanî ard ziwan ke muracatê înan ke Wezîrîya Perwerdeyî ya NRWyî rê kerdibi bi hawayêkê pozîtîfî bi netîce bi. Ulumaskanî vat: “Hendî wendekarî sey îspanyolkî, franskî do bieşkê kurdkî zî biweçînê.”

Ganî eyaletanê bînan de zî bibo

Ulumaskanî vat eke hetê keyeyan ra waştişî bibê do dibistanan de tavilî kurdkî sey dersa dîyine ya weçînitî bidîyo domananê înan. Ulumaskanî vat : “Sinifa 5 û 6. ra tepîya domanî do dimayê îngilîzkî ra kurdkî bieşkê sey ziwano dîyin o xerîb bimûsê. Naye ra musuldarîyêka pîle kewena milê keyeyanê kurdan ser. Do bi nê hawayî domanê ma ziwanê ma ya xo hîna rind bimûsê. Ganî kurdê ke eyaletanê bînan de yê zî seba dersa kurdkî cehd bidê.”   

Ganî Ewropa rê zî bibo nimûne

Serekê YMKyî Ulumaskanî veng da sazîyanê kurdan zî û vat: “Çi cewabê eyaletê NRWyî û çi zî awankerdişê platformê ziwanî yo ke bi qerarê 9 partîyanê kurdan ame awankerdene seba kurdan gamê pîl ê. Ganî heman kampanya Ewropa de zî bêro destpêkerdene.”