Donald Trumpî kombîyayîşê Qesra Sipîye ra pey Serekkomarê Tirkan Erdoganî reyde kombîyayîşê çapemenîye yê hemparî de qisey kerd. Trumpî bale ante sîstemê pawitişî yê S-400î û teyarayanê şerî yê F-35î ser. Trumpî ard ziwan ke na babete ser o karê heyetanê her di welatan dewam kenê.

Trumpî hêrişê îşxalî yê Tirkîya nêerjna û her çiqas hêrişê îşxalî dewam kenê zî îdîa kerd ke 'adirbirnayîş' dewam keno. Trumpî îdîa kerd ke Tirkîya do 'berpirsîyarîya xo bîyara ca' û vat zaf hêzî wazenê ke adirbirnayîş serkewte bo.

Trumpî îdîa kerd ke bazaro ke hetkaranê ey Mike Penceyî û Wezîrê Karanê Teberî Mike Pompeoyî menga vîyarteye de Tirkîya de kerd 'serkewte' bi û vat: "Menga vîyarteye de mi Pence û Pompeo erşawitî Anqara. Pêvînayîşêk ame kerdene û zaf serkewte bi. DYA û Tirkîya pîya çîyê pîlî kerdî. Seba çarekerdişê rewşa temîyankewte ya se serran gamê girîngî ameyî eştene." Qestê Trumpî rewşa se serran ra meseleya kurdan biba zî Trumpî eşkera nêkerd ke o îşxalkerîye senî sey çareserîye vîneno.