Sêwas de roja 2’ê Temmuz a 1993’î 33 roşinvîrî seba ke tewrê aktîvîteyanê Pîr Sûltan Abdalî bibê şîbî Otela Madimakî û rastê hêrişî ameyî. Roşinvîrî, pîya bi di wezîfedaranê otele bi paştîdayîşê dewlete hetê kîtle ra ameybî vêşnayene û qetilkerdene.

 Serrgêra 26’ine ya qirkerdişî de, çarçewaya aktîvîteyanê vîrardişî de bi des hezaran kesî saetanê sibayî de, di nuqteyan de ameyî pêser.

 Seba vîrardişê bi serkêşîya Komeleya Kulturî ya Pîr Sûltan Abdalî (PSAKD) cemxaneyê Weqfê Kulturî yê Haci Bektaşî Velîyî û Şûbeyê PSAKD’î yê Sêwasî sey adresê pêserameyîşî ameyî bewlîkerdene. 

 Xeylî cimatê sivîlî û partîyê sîyasîyî tewrê vîrardişî bîyî. HDP, DBP, CHP û EMEP mîyanê nînan de ca girewt.

 Kîtleyî, di nuqteyan ra kewtî rayîr û ver bi Caddeya Fîdanlikî ya ke cayê têhetameyîşî ya şîyî. Dimayo ke kîtleyî tîya ameyî têhet bi eştişê sloganan ver bi Otela Madimakî kewtî rayîr. Rayraşîyayîş de fotografê kesanê ke qirkerdişî de cuya xo vînî kerda ameyî kiriştene. Kîşta nê de seba temsîlê tembûrê Hasret Gultenîkî tembûrî zî ameyî kiriştene. 

Rayraşîyayîş de sloganê sey ‘Ma Sêwas xovîr ra nêkerd’, ‘Hemverê faşîzmî de doş bi doşî’, ‘Pîr Sûltanî nêmirenê, xoverdayîş beno pîl’ û ‘Hesabê Sêwasî do bêro persayene’ ameyî eştene.