Menga ramazanî ya emserî 24ê nîsane de dest pêkena. Rîyê pandemîya Covid-19î ra welatê Rojhelatê Mîyanênî emser keye de yê. Coka emser menga ramazanî de fitaro pîya, nimajo komkî û zîyaretê şaristanan ê fîrazan ê Îslamî do nêrê kerdene. Heta nêmeyê şewe de dostî zî do nêeşkê kom bibê.

Arabîstana Suûdî, Misir, Lubnan, Sûrîye, Fas û Tirkîya de reya verêne ramazan do bi nê hawayî bêro pêşwazîkerdene. Muezzînê Mekke Alî El Mollayî AFPyî rê qisey kerd û vat: ''Ma musayî yê ke camîyo pîl tim pê merdiman pir bi. Rewşa nikayêne seba merdiman zaf giran a.''

Hewteyanê peyênan de Kabe zî bêveng o. Selahîyetdaranê Suûdî seba ke verê vilabîyayîşê Korona bigêrê zîyaretê Mekke û Medîne vindarnayî. Yeno vatene ke zîyaretê seba hacî zî hetê Arabîstana Suûdî ra emser do bêro astengkerdene. Îdareyê Rîyadî venga muslumanan da ke amadekarîya xo ya seba zîyaretê Mekke taloq bikerê.

Goreyê Rêxistina Weşîye ya Dinya, tedbîrê mendişê keyeyî seba girewtişê rojeyî asteng nîyo. La rêxistine muslumanan rê pêşnîyaz kerd ke verî ke roje bigêrê fikranê doktoran bigêrê.