Şerwananê Hûsîyanê Yemenijan û sazîyanê Neteweyê Yewbîyayeyî da zanayene ke seba hetkarîya zexîreyî bidê wareyanê ke destê Hûsîyan de yê înan Hûsîyan dir pê kerdo. Hetkarî 20’ê Hezîrane de amîbî vindarnayene.
Peymane roja Şemeyî Sanaya ke destê Hûsîyan de ya amî îmzakerdene. Goreyê peymane do kesê tewr feqîrî na hetkarîye ra îstîfade bikerê.
Peymane de bale ancîyaye serê nê çîyî ke hetkarî do bi hawayêkê şefafî bêro kerdene. Neteweyê Yewbîyayeyî zî eşkera kerd ke înan peymanêka winayêne îmza kerda. Programê Zexîreyî yê Neteweyê Yewbîyayeyî (PAM) vat ke “Sana de selahîyetdaran dir muzakere ameyo kerdene û seba hetkarîya zexîreyî bêro kerdene, peymanêk amîya îmzakerdene.”
Serekê PAM’î David Beasleyî 18’ê Temmuze de eşkerayîyêk dabî û vatbi ke înan seba peymane prensîban de pê kerdo. Rîyê sûcdarîyanê ke Hûsîyî wareyanê hetkarîye de dizdî kenê hetkarî 20’ê Hezîrane de amîbî vindarnayene. Goreyê NY’yî Yemen de rîyê şerî ra 3,3 mîlyon kesî nêçareyîye ra koç kerdo û 24,1 mîlyon kesî zî lazimîya înan bi hetkarîya merdimkîye esta. No zî beno se ra 80’ê nufûse. Mîlîsê Hûsîyî yê ke Îran paştî dano înan serra 2014 de sere wedartibi û Adara 2015’î de paytext Sana bi dest fînabi. Yemeno ke Suûdî û Îran tede şerê weklatî kenê, tede krîzo tewr pîl ê merdimîye yeno ciwîyayene.
