Cigêrayîşo ke kovara zanistî Plos One de ame weşanayene, bale anceno serê germîya globale a mîyanê 30 serran de ke do xo 520 bajaranê pîlan de ramojno.

Goreyê xebera rojnameyê The Guardianî, do germîya bajaranê Ewropa hamnanî tewr tay 3,5 dereceyî û zimistanî zî 4,7 dereceyî zêde bibo.

Yeno texmînkerdene ke eyamê Parîsî yê serra 2050’î bişibo eyamê Canberra yê niakyênî. Menga tewr germe de do germayî 6,1 dereceyî zêde bo. Goreyê na yewe do her serre nisbetê 1,4 dereceyî de germayî zêde bo. Bajarê Parîsî hemverê tesîrê germîya globale de halo nêalelade îlan kerdibi.

Yeno texmînkerdene ke eyamê paytextê Almanya Berlînî zî bişibo eyamê Canberra.

Pîya bi parlamentoyê Brîtanyaya Pîle meclîsê bajaranê Londra, Basel, Oakland, Los Angeles û Vancouverî zî seba îklîmî halo lezgîn îlan kerdibi. Bajarê Konstanzî yê Almanya zî qerarêko bi heman hawayî girewtibi.

Goreyê xerîteya înteraktîfe ya cigêrayîşî bajarê Hewlêrî yê Başûrê Kurdistanî do hîna bibo germ. Goreyê na yewe menga tewr germe de do germîya Hewlêrî qasê 6,1 dereceyî yanî serrane nisbetê 2,9 dereceyî de zêde bo. Eyamê Hewlêrî do mîyanê 30 serran de bişibo eyamê bajarê Ahvazî yê Îranî.

Germîya bajarê Dîlokî yê Vakurê Kurdistanî zî do qasê 6,1 dereceyî zêde bo û bişibo eyamê nikayênî yê Hewlêrî.