UNICEF’î da zanayene ke goreyê 2017’î serra 2018’î de pêroyîya dinya de 98 welatan de nêweşîya surekan zêde bîya. Sazgehê NY’yî vat, her çiqas potansîyelê kiştişî nêweşîye de bibo zî, bi têkoşîno ke vera na nêweşîye ameyo dayene, nêweşîye ameya astengkerdene.

Mudira Pêroyî ya UNICEF’î Henrîetta Fore vat, “No vengdayîşê hîşyarbîyayîşî yo. Verê destê ma de vera nêweşîyêka zaf bijane, terpino ke  malîyetê xo erjan o esto. Nê terpinî, nê 20 serranê peyênan de nêzdîyê mîlyonêk merdim merdişî ra xelesna.”

Emser nêweşîya surekan tewr zaf Ukrayna de, Filîpîn û Brezîlya de asaye. 2018 de Ukrayna de 35 hezar û 120 kesî na nêweşîye girewte. Wexto ke merdim nê netîceyan rewşa serra 2017’î de bido têver, vîneno ke nêzdîyê 30 hezarî kesî zêde bîyê. Goreyê hukmatê Ukrayna di menganê serra 2019 de 24 hezar û 42 kesî nêweşîya surekan girewta.

Brezîlaya de par tewr kêm 10 hezar û 262 kesan nêweşîya surekan girewte. Goreyê UNICEF’î Fransa de 2017 de 519 kesan na nêweşîye girewte û 2018 de zî hezar û 788 kesan nêweşîya surekan girewte.