Torra Ziwan û Kulturî sere de ziwanê kurdkî vera çinbîyayîşê ziwananê herême ronayîye. Torra Ziwan û Kulturî  hunermend, nuştox, cigêrayox û roşnvîrî zî tede do bi tewrbîyayîşê 300 kesan 11-12ê çeleyê 2020î de Amed de do komxebatêke viraze. Avukatnê Komeleya Huqûqnasanê Seba Azadîye (OHD) ra Riza Polato ke heyetê şêwirmendîye yê torre de ca gêno derheqê babete de Ajansa Mezopotamya rê qisey kerd.

Rixmê Heme Polîtîkayanê Asîmîlasyonî Kurdkî Heta Ewro Ameye

Polatî vist vîrî ke rixmê polîtîkaya çînkerdişê kultur û estbîyayîşê kurdan ya ke tarîxî ra yena rayraberdene şarê kurdî ziwan û kulturê xo pawitê û vat: ''Badê ronayîşê Torra Ziwan û Kulturî OHDyî Komîsyonê Ziwanê Kurdî rona. Heta nika ma mîyanê şarî de zanayîşêk nêarde ra. Na kêmîya ma ya. Ma bi nê komîsyonî wazenê ke ewro ra tepîya berpîrsîyarîya xo bîyarê ca. Ganî vera polîtîkaya asîmîlasyonî yê vera kultur û ziwanan ma heme pîya tê bigêrê.''

Kurdkî Bi Hezaran Serran o ke Na Herre de Yena Qiseykerdene

Polatî bale ante Ferhengê Terîmanê Huqûqî yê Kurdkî yê Baroyê Amedî ser û vat: ''Ganî xebatê winayênê her hetî ra bizêdîye. No seba huqûqnasanê kurdan destpêkerdiş o. Ma eşkenê huqûqî açarnê kurdkî ser. Têna huqûqnasî ney heme dezgehî ganî hetê teorî û akedemîkî ra dest bi xebatan bikerê. Eke ma wayîrê ziwanê xo mevêjê ziwan dest ra şino û ma lete benê. Ziwanê kurdkî mehkeme û meclîsî de sey ‘ziwanêko nêno zanayene‘ ravêreno.  Xora rîyê na polîtîkaya înan a leyşine ra ma nê halê de yê. Kurdkî bi hezaran serran o no na herre de yena qiseykerdene.''

Ganî Sîyadetmadarî Kurdkî Bîgêrê Rojdem

Polatî ard ziwan ke semedê wayîrvejîyayîşê kurdkî yewbîyayîş girîngo û vat: ''Ganî ma semedê ziwanî yew bê. Şansê ma çîn o ke ma yewbînan ra dûrî vinderê. Çunku her çî ziwan de yo. Sîyaset, dîn, îdeolojî, heskerdiş… Kurdkî ameya yew nuqta ke hînî cuya rojane de nîna qiseykerdene. Ganî ma bi têkoşînêkê xurtî wayîr vejê ke wa ziwanê ma nêro vîrrakerdene. Ganî sîyadetmedarî ziwanî bîgêrê rojdem û her warê komelî de derheqê ziwanê dayîke zanayîş bêro afernayene. Ziwanê ma sebebê estbîyayîşê ma yo. Ziwanê ma wayîrê tarîxêkê biqoq, kultur û edebîyatî yo.  Ganî ma wayîrê ziwanê xo bivejîyê û tirkî keyeyê xo megêrê. Eke ziwanê ma destê ma ra şiro çîyêkê ma nêmaneno.''