Fîlîpîn welatêkê başûrê rojakewtenê Asya yo ke 8 hezar girawan ra yenê pê. Goreyê qanûnêkê neweyî yo ke Fîlîpîn de ameyo amadekerdene, wendekarî  wendegehê verênî ra heta ûnîversîte seba ke bieşkayê dîploma bigêrê ganî daran bikarê.

Qanûn çend hewteyî verê cû hetê Meclîsê Temsîlkaran ra ame qebûlkerdene, ke dezgehê qanûndayîşî yê Fîlîpînî yo. Goreyê qanûnî, wendekarî seba her wendegehî mecbûr ê ke serre de tewr kêmî 10 daran bikarê. Qanûn seba ke bikewo vîyartbarîye ganî hetê Senatoyî ra zî bêro tesdîqkerdene. Parlamenter Gary Alejano ke pêşnûmeya qanûnî amade kerda, ard ziwan ke ê wazenê kulturê hemwelatijîya bi zanayîşî û berpirsîyarîya cimatî ciwanan reyde biafernayê. Qanûnî reyde wendekarî seba ke bieşkayê dîploma bigêrê ganî wendegehano ke wanenê de do tewr kêmî 10 daran bikarê.

Fîlîpîn de her serre 12 mîlyonî wendekarî şinê wendegeho verêne, 5 mîlyonî wendekarî şinê lîse û 500 hezarî wendekarî zî şinê unîversîte. Bi saya qanûnî do serre de 175 mîlyonî darê neweyî bêrê ronayene. Fîlîpîn de seserra 20’an de zêdebîyayîşê nufusî reyde karê zîretî zî zêde bî û ney zî vernîya çinkerdişê daristanan akerd. Yeno texmînkerdene ke mîyanê serranê 1930 û 1980'î de 98 hezar kîlometreçargoşe (9,8 mîlyon hektar) wareyê daristanî çin bîyî.  Destpêkê seserra 20’an de Fîlîpîn de se ra 70 erdê daristanin bi. Labelê no nisbet nika kewt se ra 20.