Zîyaretê semedê Wekîlê DEM Part û Endamê Heyetê Îmraliyî Sirri Sureyya Onderî yo ke beşê ciewnîyayîşê giranî de yo, dewam kenê. Hetanê huner, sîyaset û komelê sîvîlî ra xeylê kesî ameyî Nêweşxaneyê  Florence Nightingale.

Cemê şanî xeylê temsîlkarê komel, rêxistinanê bawerî  û sendîkayan Onder zîyaret kerd. Reyna Serekê Meclîsî Numan Kurtulmuş, Serekê Pêroyî yê CHPyî Ozgur Ozel, Hetkarê Serekê Pêroyî yê AKPyî Omer Çelik, Endamê Heyetê Serekan ê Partîya Çepe Alper Taş û temsîlkarê pabesteyanê partîya ma, Walîyê Îstanbul Davut Gul, Serekê AKPyî yê Bajarî û heyetê ci ameyî nêweşxane.

Menderes Samancilar zî tede hunermendî, Erene Keskin û xeylê temsîlkarê rêxistinanê heqan, wekîlî, sîyasetmadarî, rojnameger û nuştoxî semedê zîyaretî ameyî nêweşxane.

Doktoran ke amelîyat kerd zanayîş da pêro heyetan. Reyna çapemenîye zî heta şan verê nêweşxaneyî de pawit.

Binali Yildirim, Walîyê Aksarayî Mehmet Ali Kumbuzoglu, Nesrine Nas, Cemil Çiçek, Mustafa Elitaş, Serekwekîlê Grûba MHPyî Erkan Akçay û Serekê EHPyî Hakan Ozturk zî bi telefonî şîfa waşte .Reyna Serekkomar Erdoganî zî kênaya Onderî telefon kerd û şîfa waşte.

Kesê ke ameyî zîyaret Hemserekê Pêroyî yê DEM Partî Tulaye Hatimogullari û Tuncer Bakirkanî û doktoranê ke amelîyat kerd înan ra zanayîş girewt.

Ozelî vat: ''Mi xeylê rey o zîndan de zîyaret kerd û tekîlîya ma hem şexsî hem zî yê karî est a. Ma bîn şewe xebara ci ya xirabe girewte.  O wextî ra ma birêz hemserekan û Pervîne xanime reyde dîyalogê xo nêbirna. Ma ewro ameyî tîya derheqê rewşa ci de zanayîş girewt û ci rê dûa kenê. Doktoran vat rewşe zaf giran a la averşîyayîşê sey mucîze zî est ê.''