Avûkat Lukas Theuneyo ke vera qedexeyê serê PKKyî muracatê Mehkemeya Îdarî ya Berlinî kerd û vat: ‘’Ganî hukmat têbigêro, qedexeyê vera PKKyî wedarno û sûcdarkerdiş û hepskerdişê kurdan ra fek vera bido.’’
PKKyî Kongreya 12ine de bire dabî ke xo fesh bikero û çekan war verdo.
Almanya de 1993 ra nata pêro xebat û aktîvîteyê PKKyî qedexe yê. Avûkat Lukas Theuneyî verê cû muracatê Wezîrîye kerdibi ke qedexe bêro wedaritene la wezîrîye no red kerd. Avûkatî dima vera qedexeyê serê PKKyî muracatê Mehkemeya Îdarî ya Berlinî kerd. Theuneyî derheqê babete de ajansê ma rê qisey kerd.
Avûkat Lukas Theuneyî wina qalê prosesê muracatî kerd: ‘’Ma nameyê PKKyî ser o vera qedexeyî dewa akerde. Hukmatê Federalî îdîa kerd ke ne dîyar o ke vengdayîşê Ocalanî yê seba feshkerdişê PKKyî û çekverdayîşî bêrê tesdîqkerdene yan ney. Kongreya PKKyî ra dima ma wina bawer kenê ke hukmatê Almanya do bire biercno, qedexeyî wedarno û têgêrayîşê kurdan reyde beşdarê prosesî bibo.’’
Wezîrîya Karanê Teberî cewabêko pozîtîf da eşkerayîyanê Ocalanî û Kongreya PKKyî. La polîsanê Wezîrîya Karanê Zereyî Hemserekê KCDK-E yo verên Yuksel Koç destbend kerd. Avûkat Lukas Theuneyî naye ser o no ercnayîş kerd: ‘’Eşkerayîya Wezîrîya Karanê Teberî hetê endama Keskan Annalena Baerbock ra dîyabî. Wezîrê Karanê Teberî yê neweyî Wadelphulî hema tewirê xo nêmojna. La ma bawer kenê ke Almanya do paştî bida prosesê haştîye.
Ganî Hukmatê Almanya seba wedarîyayîşê qedexeyê vera PKKyî têbigêro û sûcdarkerdiş û hepskerdişê kurdan ra fek vera bido. Ganî prosesê haştîye bêro destekkerdene. Eke no bêro kerdene kurdê Almanya do bişinasîyê û polîtîkayê krîmînalîzekerdiş û cezakerdişî biqedê.’
