Hemserekê Pêroyî yê DEM Partî Tuncer Bakirhanî kombîyayîşê grûbe yê meclîsî de averşîyayîşê rojdemî erjnayî.

Bakirhanî  pêvînayîşo ke Serekê Pêroyî yê MHPyî Devlet Bahçeliyî reyde kerd, vist vîrî û vat pêvînayîş hole ravîyart û temasî do dewam bikerî.

Bakirhanî bale ante rewşa Rojhelatê Mîyanênî ser û nê vatî: “Tay hêzî cayê xo bedilnenê. Rojhelatê Mîyanênî reyna merkezê nê karan de yo û hedef de yo. Dengeyê verênî xeripîyenî, her kes kewto peyê xêzkerdişê rotaya seserra ameyoxî. Xora ma zî hem mîyanê arvşîyayîşanê dinya de yê hem zî yê Rojahelatê Mîyanênî de yê.Tirkîya sererê averşîyayîşanê Rojhelatê Mîyanênî de ya. Ma zî bi destpêkerdişê nê prosesî vanê ke bêrê ma pîya rota û rayîrê xo xêz bikerê. Wa çewna rotaya ma bewlî mekero. Wa rotaya ma şarê Tirkîya bewlî bikerî. Wa Vengdayîşê Haştîye û Komelê Demokratîkî bibo rotaya ma. Komara Demokratîke bibo rotaya ma. Rotaya ke kurd û elewîyî hemwelatîye seyyewbînî yê wa bibo rotaya ma. 

Kam ke rotaya xo bewlî mekero rotaya ci hetê hêzanê emparyalan û hegemonîkan ra yena bewlîkerdene. Rotaya ke ê bewlî kenê şaranê yê welatan rê hem zî herême rê yê herême rê gonî, dej û hesran ana. Ma wazenê ke wa dej biqedîyo û têkoşînê nê dane. Na herre de tirk, kurd, elewî, sunî her rengê komelî ra merdimî ciwîyenê. Çew çewî ra cor ya zî cêr de nîyo. Ma pêro hemwelatîyê nê welatî yê. Nê porsesî de bi mutabakatê Netewa Demokratîke zemîno ke raşt yê seyyewbînîye eşkeno bêro ronayene. Şarê Rojhaletê Mîyanênî raya verene eşkenê senaryoyê xo bi xo binusê. Ma senaryoyê xo pîya binusê. Vengdayîşê Birêz Ocalanî ma rê bêrî akeno ke ma rota û senaryoyê xo binusê.”