Enstîtuyê Kurdan ê Îstanbulî de seba dersanê kurdkî yê termînê payîzî eleqeyêko pîl esto. Kapasîteya dersan heta nika seba 600 kesan bîye la pawîyeno ke enstîtu kapasîteya xo bizêdîno. 

Mamostayanê Entîtu ra Eyup Subaşiyî  ANFyî reyde qisey kerd. Subaşiyî bale ante eleqeyê seba musayîş û averberdişê kurdkî ser û îfade kerd ke no îsbat keno ke bedelê ci çita beno wa bibo kurdî ziwanê xo pawenê.

Mamosta Eyup Subaşiyî vat: ''Pandemî ra verî ma komeleya xo de dersî dayêne coka ma nêeşkayêne xo biresnê zêdêr merdiman. Kursê ma nika online yê. Naye ra xeylêk şaristan û welatan ra seba kursan muracatî yenê.''

Subaşiyî qedexe û tedaya vera kurdkî vistî vîrî û vat: ''Rixmê nînan zî kurdî wazenê ziwanê xo aver berê û bimusê. Eleqeyê seba kurdkî zî îsbatê no yo. Dewlete xîret kena ke ziwan û kulturê kurdan krîmînalîze bikera. La kurdî reyna zî wayîrê ziwan û kulturê xo vejîyenê. Dişmenîya dewlete ya vera kurdkî û kurdan rojanê peyênan de reyna eşkera bîye. Eleqeyê kurdan ê seba kurdkî nê mesajî dano ke bedelê ci çita beno wa bibo kurdî ziwanê xo do bipawê.''